சுமார் 13 வயதேயாகும் கிம் ஜு ஏ, கடந்த சில மாதங்களாகத் தனது தந்தை கிம் ஜாங் உன்னுடன் முக்கியமான ராணுவ மற்றும் அரசு விழாக்களில் தொடர்ந்து பங்கேற்று வருகிறார். தென் கொரியாவின் தேசிய உளவுத்துறை (NIS), "பயிற்சி பெறும் நிலை" (Successor training) என்பதிலிருந்து தற்போது "வாரிசாக நியமிக்கப்பட்ட நிலை" (Successor-designate stage) என்ற நிலைக்கு ஜு ஏ உயர்ந்துள்ளதாகத் தென் கொரிய நாடாளுமன்றக் குழுவிடம் தெரிவித்துள்ளது. குறிப்பாக, அரசு கொள்கைகளில் அவர் தனது கருத்துகளைப் பதிவு செய்யத் தொடங்கியுள்ளதும், ராணுவப் பணிகளை நேரடியாக ஆய்வு செய்வதும் அவர் அடுத்த தலைவராக உருவெடுப்பதைக் காட்டுகிறது.
கடந்த 2022-ஆம் ஆண்டு ஏவுகணைச் சோதனையின் போது முதன்முதலில் பொதுவெளிக்கு அறிமுகமான ஜு ஏ, அதன் பிறகு பலமுறை தனது தந்தையுடன் கைகோர்த்துச் செல்லும் புகைப்படங்கள் வெளியாகி வைரலாகின. சமீபத்தில் பீஜிங் பயணம் மற்றும் முக்கிய ராணுவ அணிவகுப்புகளில் அவர் முன்னிலைப்படுத்தப்பட்ட விதம், அவர் வெறும் செல்ல மகள் மட்டுமல்ல, நாட்டின் அடுத்த அதிகாரம் என்பதை உறுதிப்படுத்துவதாக உளவுத்துறை கருதுகிறது. வடகொரிய அரசு ஊடகங்கள் அவரை 'மதிக்கத்தக்க குழந்தை' மற்றும் 'சிறந்த வழிகாட்டி' போன்ற அடைமொழிகளுடன் குறிப்பிடுவது, பொதுவாக அந்நாட்டின் உயர்மட்டத் தலைவர்களுக்கு மட்டுமே வழங்கப்படும் மரியாதையாகும்.
வடகொரியா ஒரு ஆணாதிக்கச் சமூகம் என்றாலும், கிம் ஜாங் உன்னின் சகோதரி கிம் யோ ஜாங் ஏற்கனவே அதிகாரத்தில் செல்வாக்குடன் இருப்பது, கிம் ஜு ஏ தலைவராவதற்கு முன்னுதாரணமாகப் பார்க்கப்படுகிறது. கிம் ஜாங் உன்னுக்கு ஒரு மூத்த மகன் இருப்பதாக நம்பப்பட்டாலும், அவர் இதுவரை ஒருமுறை கூட பொதுவெளியில் தோன்றியதில்லை. ஆனால், ஜு ஏ தொடர்ந்து முன்னிலைப்படுத்தப்படுவது, அவர் குடும்பத்தின் நான்காம் தலைமுறைத் தலைவராகத் தயார்படுத்தப்படுவதை உறுதி செய்கிறது. அவர் தனது தந்தையை விட உயரமாக நிற்பது மற்றும் சமமாக நடந்து செல்வது போன்ற புகைப்படக் குறியீடுகள் மிக முக்கியமான அரசியல் செய்தியாகப் பார்க்கப்படுகின்றன.
வரும் பிப்ரவரி இறுதியில் நடைபெறவுள்ள வடகொரியாவின் 'தொழிலாளர் கட்சி மாநாட்டை' (Workers' Party Congress) உலக நாடுகள் உன்னிப்பாகக் கவனித்து வருகின்றன. இந்த மாநாட்டில் கிம் ஜு ஏ-வுக்கு ஏதேனும் அதிகாரப்பூர்வ பதவி வழங்கப்படுமா அல்லது அவரது வாரிசு அந்தஸ்து சட்டப்பூர்வமாக உறுதி செய்யப்படுமா என்பது தெரியவரும். அவர் தலைவராகத் தேர்வானால், 1948-ஆம் ஆண்டு வடகொரியா உருவானதற்குப் பிறகு அந்நாட்டை ஆளும் முதல் பெண் தலைவர் என்ற வரலாற்றைப் படைப்பார். இருப்பினும், அவரது இளம் வயது மற்றும் ஆணாதிக்கச் சூழல் ஆகியவை அவருக்குச் சவாலாக இருக்கும் என அரசியல் வல்லுநர்கள் கருதுகின்றனர்.
