ஈரான் தாக்குதல் தொடர்பான காணொளிகளைப் பகிர்ந்தால் சிறை: ஐக்கிய அரபு அமீரகம் கடும் எச்சரிக்கை

மத்திய கிழக்கில் நிலவும் போர் பதற்றங்களுக்கு மத்தியில், ஈரான் ஏவிய ஏவுகணைகள் மற்றும் ட்ரோன் தாக்குதல் தொடர்பான காணொளிகள் மற்றும் புகைப்படங்களை சமூக வலைதளங்களில் பகிர்ந்ததற்காக ஐக்கிய அரபு அமீரகத்தில் 21 பேர் கைது செய்யப்பட்டுள்ளனர். இதில் பிரித்தானிய சுற்றுலாப் பயணி ஒருவரும் அடங்குவார் எனத் தகவல்கள் தெரிவிக்கின்றன. தாக்குதல் நடந்த இடங்களை படம் பிடிப்பதோ அல்லது அவற்றை இணையத்தில் பரப்புவதோ பொதுமக்களிடையே தேவையற்ற பீதியை ஏற்படுத்தும் என்றும், நாட்டின் பாதுகாப்பைக் குலைக்கும் என்றும் அமீரக அரசு எச்சரித்துள்ளது. சட்டத்தை மீறுபவர்கள் மீது கடும் சட்ட நடவடிக்கை எடுக்கப்படும் என்று அந்நாட்டின் சட்டத்துறை உறுதிபடத் தெரிவித்துள்ளது.

பிரித்தானியாவைச் சேர்ந்த 60 வயது நபர் ஒருவர், துபாயில் ஏவுகணைகளை படம்பிடித்ததாகக் கூறி கைது செய்யப்பட்டுள்ளார். அவர் அந்தப் பதிவுகளை உடனடியாக நீக்கியிருந்தாலும், சட்டவிரோதமாகச் செயல்பட்டதாகக் கூறி அவர் காவல்துறையின் பிடியில் வைக்கப்பட்டுள்ளார். அமீரகத்தின் சைபர் குற்றவியல் சட்டங்களின்படி (Cybercrime laws), இத்தகைய செயல்கள் தேச பாதுகாப்புக்கு எதிரானதாகவும், தவறான தகவல்களைப் பரப்பும் குற்றமாகவும் கருதப்படுகிறது. தாக்குதல் நிகழ்ந்த இடங்கள், சேதமடைந்த பகுதிகள் அல்லது ஏவுகணைச் சிதறல்களைப் படம்பிடித்துப் பகிர்வது ஒரு வருட சிறைத்தண்டனை மற்றும் பெரும் அபராதத்தைப் பெற்றுத்தரும் என்று அமீரக அரசு ஏற்கனவே பொதுமக்களுக்கு எச்சரிக்கை விடுத்திருந்தது.

அமெரிக்கா மற்றும் இஸ்ரேல் படைகள் ஈரான் மீது தாக்குதல்களைத் தொடங்கிய பிறகு, வளைகுடா பிராந்தியமே பெரும் பதற்றத்தில் உள்ளது. போர்க்காலச் சூழலில் பரப்பப்படும் தவறான தகவல்கள், செயற்கை நுண்ணறிவு (AI) மூலம் உருவாக்கப்பட்ட போலியான காணொளிகள் மற்றும் வதந்திகள் சமூக அமைதியைக் கெடுப்பதாக அமீரக அதிகாரிகள் கவலை தெரிவித்துள்ளனர். பொதுமக்கள் அதிகாரப்பூர்வ அரசு அறிக்கைகளை மட்டுமே நம்ப வேண்டும் என்றும், சமூக வலைதளங்களில் காணும் உறுதிப்படுத்தப்படாத தகவல்களைப் பகிர வேண்டாம் என்றும் அறிவுறுத்தப்பட்டுள்ளது. துபாய் மற்றும் அபுதாபி போன்ற சுற்றுலாத் தலங்களில் உள்ள வெளிநாட்டினர் மற்றும் குடியிருப்பாளர்கள், உள்ளூர் சட்டங்களை மதித்து நடக்குமாறு தத்தமது நாடுகளின் தூதரகங்கள் வலியுறுத்தியுள்ளன.

இந்தக் கடுமையான கட்டுப்பாடுகள், போர்க்களத்தில் எதிரி நாடுகள் உளவு பார்க்கப் பயன்படுத்தும் 'Battle Damage Assessment' (சேத மதிப்பீடு) தகவல்கள் கசிவதைத் தடுப்பதற்கான ஒரு பாதுகாப்பு நடவடிக்கையாகவே பார்க்கப்படுகிறது. பிற வளைகுடா நாடுகளான பஹ்ரைன், குவைத் மற்றும் கத்தாரும் இதேபோன்ற கடுமையான எச்சரிக்கைகளை விடுத்துள்ளன. போர் தீவிரமடைந்துள்ள சூழலில், தனிநபர்களின் ஒரு சிறிய காணொளிப் பதிவு, தேசியப் பாதுகாப்பிற்குச் சவாலாக அமையக்கூடும் என்பதால், இத்தகைய விவகாரங்களில் அமீரக அரசு துளியும் மெத்தனம் காட்டப் போவதில்லை என்பதில் உறுதியாக உள்ளது.