15 வயது சிறுமியின் நிர்வாணா வீடியோ அழைப்பிற்கு நிமிடத்துக்கு 1000 ரூபா.

 

15 வயது சிறுமியை பாலியல் தேவைகளுக்காக பணத்திற்கு விற்பனை செய்த சம்பவத்தில் தினமும் புதிய புதிய அதிர்ச்சி செய்திகள் வெளியாகிக் கொண்டிருக்கிறது.சிறுமியை பணம் கொடுத்து வாங்கிய பல்வேறு தரப்பினரும் நாள்தோறும் கைது செய்யப்பட்டு வருகிறார்கள். சமூகத்தில் அந்தஸ்துள்ளவர்களாக காண்பித்துக் கொண்டு, மிக மோசமான நடவடிக்கையில் ஈடுபட்ட பலர் அம்பலமாகி வருகிறார்கள். இதுவரை 41 பேர் கைது செய்யப்பட்டுள்ளனர்.

தற்போது, சிறுமி மருத்துவமனையில் அனுமதிக்கப்பட்டுள்ளார்.

உடல் சிகிச்சைக்கு மேலதிகமாக, அவர் மருத்துவமனையில் மனநல சிகிச்சையைப் பெறுவதாகவும் கூறப்படுகிறது. சிறுமிக்கு ஏற்பட்ட உடல் காயங்களை விட மன காயங்கள் மிகவும் கடுமையானவை என்று சிறுவர் பாதுகாப்பு அதிகாரசபையின் தலைவர் பேராசிரியர் முதித விதானபத்திரன தெரிவித்தார்.

சிறுமி போதைக்கு அடிமையாக்கப்பட்டுள்ளதாகவும் அவர் கூறினார். சிறுமிக்கும் சமூக நோய்கள் ஏற்படும் அபாயம் இருப்பதாகவும் சுட்டிக்காட்டினார்.

அத்தகைய பின்னணியில் சிறுமி பல சிக்கல்களை எதிர்கொள்கிறார் என்று அவர் மேலும் கூறினார்.

இந்த குற்றச்செயலில், ஒரு போலீஸ் அதிகாரியும் ஈடுபட்டுள்ளார்

சம்பந்தப்பட்ட சிறுமியின் மொபைல் போனில் உள்ள தரவுகளை பகுப்பாய்வு செய்வதன் மூலம் வரிசையாக கைதுகள் நடந்து வருகின்றன. நேற்று, பொலிஸ் விளையாட்டு பிரிவில் மட்டக்களப்பில் பணியாற்றி வந்த ஒரு சப் இன்ஸ்பெக்டர், முன்னாள் வங்கி மேலாளர் கைதாகினர்.

62 வயதான வங்கி மேலாளர் இரத்மலனவில் வசிப்பவர்.

இருவரும் நேற்று முன்தினம் (11) நீதிமன்றத்தில் ஆஜர்படுத்தப்பட்டு 20 ஆம் திகதி வரை விளக்கமறியலில் வைக்கப்பட்டுள்ளனர். டி சந்தேக நபர்கள் அன்றைய தினம் அடையாள அணிவகுப்புக்காக ஆஜர்படுத்தப்படவுள்ளனர். மொபைல் போன் தரவு குறித்து மேலும் பகுப்பாய்வு மேற்கொள்ளப்பட்டு, சிறுமியுடன் உறவு வைத்திருந்த மேலும் பலரை கைது செய்யவுள்ளதாக பொலிசார் தெரிவித்துள்ளனர்.

சிறுமியின் வாக்குமூலத்தின் படி, தன்னை தந்தையே முதலாவதாக துஷ்பிரயோகத்திற்குள்ளாக்கியதாக தெரிவித்துள்ளார். 2018 இல் இது நடந்தது. சிறுமிக்கு 12 வயது. தந்தையும், துஷ்பிரயோகத்திற்கு ஒத்தாசையாக இருந்த குற்றச்சாட்டில் தாயும் கைதாகியிருந்தனர்.

தற்போது 41 பேர் கைது செய்யப்பட்டுள்ளனர்.

அவர்களில் ஒரு அரசியல்வாதி, இரண்டு இரத்தினக்கல் வணிகர்கள், ஒரு மருத்துவர், ஒரு நடிகர் மற்றும் ஒரு பௌத்த பிக்கு உள்ளடங்குகின்றனர்.

மேலும், மாலைதீவில் முன்னாள் அமைச்சர் ஒருவரும் சிறுமியை வாங்கியவர்களில் ஒருவர். மகளின் விற்பனையில் சிறுமியின் தாயும் ஈடுபட்டிருந்தார், அவரும் கைது செய்யப்பட்டார். இந்த நேரத்தில், அவர் கர்ப்பமாக இருந்தார் என்ற அடிப்படையில் அவருக்கு பிணை வழங்கப்பட்டது.

கைது செய்யப்பட்ட நடிகர்

இந்த சம்பவம் தொடர்பாக ஒரு நடிகர் மற்றும் ஒரு பாடகர் கைது செய்யப்பட்டுள்ளதாக போலீசார் தெரிவித்தனர். கண்டியில் வசிக்கும் சந்தேகநபர் பண்டாரவளையில் கைது செய்யப்பட்டார். இந்த நபரும் சிறுமியை பணத்திற்காக வாங்கி பாலியல் தொழிலுக்கு பயன்படுத்தியதாக தெரிவிக்கப்பட்டுள்ளது.

இணையத்தில் வெளியிடப்பட்ட விளம்பரம் மூலம் அவர் சிறுமியை பணம் செலுத்தி பெற்றுள்ளார். இந்த சம்பவம் தொடர்பாக பம்பலப்பிட்டியில் உள்ள ஒரு ஹோட்டலின் மேலாளர் கைது செய்யப்பட்டுள்ளார்.

நடிகர் / பாடகரை இந்த மாதம் 24 ஆம் திகதி வரை விளக்கமறியலில் வைக்க கொழும்பு மாஜிஸ்திரேட் நீதிமன்றம் உத்தரவிட்டது.

மருத்துவர்

சிறுமியை வாங்கியதாக கூறப்படும் கடற்படை அறுவை சிகிச்சை நிபுணர் சேவையிலிருந்து இடைநிறுத்தப்பட்டுள்ளார். இந்த சம்பவம் தொடர்பான விசாரணை மற்றும் நீதித்துறை நடவடிக்கைகளுக்கு உதவுவதை நோக்கமாகக் கொண்டு இந்த நடவடிக்கை எடுக்கப்பட்டுள்ளதாக பாதுகாப்பு அமைச்சகம் வெளியிட்டுள்ள அறிக்கையில் தெரிவிக்கப்பட்டுள்ளது.

பாதுகாப்பு அமைச்சின் அறிவுறுத்தல்களின் பேரில் கடற்படைத் தளபதி அவரது சேவையை உடனடியாக நிறுத்திவைக்க நடவடிக்கை எடுத்ததாகவும் அதில் குறிப்பிடப்பட்டுள்ளது. பாதுகாப்பு அமைச்சின் அறிவுறுத்தலின் பேரில் கடற்படைத் தளபதியின் உத்தரவின் பேரில் இந்த சம்பவம் குறித்து உள் விசாரணை நடத்தப்பட்டு வருவதாகவும் அந்த அறிவிப்பில் குறிப்பிடப்பட்டுள்ளது.

மேலதிக அறிவிப்பு வரும் வரை சம்பந்தப்பட்ட மருத்துவர் இலங்கை கடற்படைக்கு சொந்தமான எந்தவொரு நிறுவனத்திலும் நுழைய அனுமதிக்க மாட்டார் என்று பாதுகாப்பு அமைச்சகம் மேலும் கூறுகிறது. அவர் சிறுமிக்கு 15,000 ரூபா வீதம் இரண்டு முறை செலுத்தியுள்ளார்.

முன்னாள் அமைச்சர்

சிறுமியை வாங்கி அவருடன் உடலுறவு கொண்ட ஒரு மாலத்தீவு நாட்டவரும் 4 ஆம் திகதி கைது செய்யப்பட்டார், இப்போது அவர் மாலத்தீவில் முன்னாள் அமைச்சர் என்பது தெரிய வந்துள்ளது. 45 வயதான மொஹமட் அஷ்மாலி அந்த நாட்டில் நிதியமைச்சராக இருந்துள்ளார்.

மாலைதீவின் முன்னணி தொலைத் தொடர்பு நிறுவனங்களில் ஒன்றான டிராகுவின் தலைவராகவும் இருந்துள்ளார். அவருடன் கொழும்பில் உள்ள ஒரு ஹோட்டல் மேலாளரும் கைது செய்யப்பட்டார.  முன்னாள்  அமைச்சருக்கு சிறுமியுடன் உடலுறவு கொள்ள தங்குமிடம் கொடுத்த குற்றச்சாட்டு அவர் மீது சுமத்தப்பட்டுள்ளது.

மேலும், பாலியல் சேவைகளுக்காக ஒரு பெண்ணை விற்பனை செய்யும் விளம்பரம் வெளியிட்ட ஒரு வலைத்தளத்தின் உரிமையாளர் மற்றும் அதன் நிதி மேலாளராக பணியாற்றிய ஒரு நபரும் நேற்று கைது செய்யப்பட்டவர்களில் அடங்குவர்.

சிறுமியை விற்பனை செய்வதற்காக நான்கு வலைத்தளங்களில் விளம்பரங்கள் வெளியிடப்பட்டிருப்பது விசாரணையில் தெரிய வந்துள்ளது.

அந்த வலைத்தளங்களில் பலர் கைது செய்யப்பட்டுள்ளனர், மேலும் இதுபோன்றவர்களைக் கண்டுபிடிப்பதற்கான தேடல் நடவடிக்கைகள் நடந்து வருகின்றன. மற்றொரு வலைத்தளம் குறித்து விசாரிக்கப்பட்டு வருகிறது.

தொடரும் விசாரணை

இந்த சம்பவம் குறித்து மவுண்ட் லவனியா காவல்துறை  விசாரணைகளை ஜூன் 18 அன்று தொடங்கியது. சிறுமி மவுண்ட் லவனியாவில் உள்ள ஒரு அடுக்குமாடி குடியிருப்பில் தங்க வைக்கப்பட்டிருந்தார். இந்த விவகாரத்தில் முக்கிய சூத்திரதாரி, வீட்டிற்கு ரூ .65,000 மாத வாடகை செலுத்தியுள்ளார்.

சிறுமியை வீட்டில் தங்க வைக்கப்பட்டு, அவரது புகைப்படங்கள் இணையத்தில் வெளியிடப்பட்டன. சமூக ஊடகங்களில் விளம்பரங்கள் வெளியிடப்பட்டு, அவர் பணத்திற்காக விற்கப்பட்டடிருந்தார்.

சிறுமி பாலுறவுக்காக பல்வேறு நபர்களுக்கு விற்கப்பட்டதில், பிரதான சூத்திரதாரி செல்வந்த வாடிக்கையாளர்களிடமிருந்து இலட்சக்கணக்கில் பணம்  வசூலித்துள்ளார்.

நிமிடத்திற்கு 1000

இந்த ஆண்டு ஜனவரி முதல் (2021) அவர் இந்த மோசடியில் ஈடுபட்டுள்ளார் என்பது முதற்கட்ட விசாரணையில் தெரிய வந்துள்ளது. அவர் இணையத்தில் அந்தப் பெண்ணுக்கான வலைப்பக்கங்களையும் உருவாக்கி அதன் மூலம் அந்தப் பெண்ணின் படங்களை வெளியிட்டுள்ளார்.

சிறுமியை பாலுறவுக்கு விற்பனை செய்வதோடு மட்டுமல்லாமல், சிறுமியின் நிர்வாணத்தையும் விற்பனை செய்துள்ளார். இணையதளத்தில் வீடியோ அழைப்புகள் மேற்கொண்டு, சிறுமியின் நிர்வாண காட்சிகளை லைவ் மூலம் காணலாம் என்றும் விளம்பரப்படுத்தியுள்ளார். இதற்கான கட்டணமாக, நிமிடத்திற்கு ரூ .1,000 மற்றும் 10 நிமிடங்களுக்கு ரூ .10,000 வசூலித்தார்.

Contact Us