ஜோதிகாவின் திரை வசனத்தால் சிறுமிக்கு கிடைத்த நீதி..! சென்னை நிஜ சம்பவம்

சென்னை அருகே 9 வயது சிறுமிக்கு பாலியல் தொந்தரவு கொடுத்த உறவினருக்கு 5 ஆண்டுகள் சிறை தண்டனை

சென்னை வண்ணாரப்பேட்டை அருகே 9 வயது சிறுமிக்கு பாலியல் தொல்லை கொடுத்த 48 வயதான உறவினருக்கு நீதிமன்றம் 5 ஆண்டு சிறை தண்டனை வழங்கியுள்ளது. முதலில் இந்த வழக்கு பதிவதற்கு நடிகை ஜோதிகா நடிப்பில் வெளியான ‘ பொன்மகள் வந்தால்’ திரைப்படத்தின் வசனம் காரணம் என்று பேசப்படுகிறது. அந்த படத்தில் வரும் ‘ தாயிடம் எதையும் மறைக்கக்கூடாது என்ற காட்சியை டிவியில் பார்த்து, தனக்கு பாலியல் தொல்லை கொடுத்த உறவினர் பற்றி பாதிக்கப்பட்ட சிறுமி தாயிடம் கூறிய பிறகுதான் புகார் அளிக்கப்பட்டதாக கூறப்படுகிறது.

வண்ணாரப்பேட்டையில் வசிக்கும் கவிதா (பெயர் மாற்றப்பட்டுள்ளது) என்பவரின் 9 வயது மகளை கடந்த 04.06.2020 அன்று அதே பகுதியைச் சேர்ந்த கணேசன் என்பவர் தனியாக அழைத்து சென்று பாலியல் தொந்தரவு கொடுத்துள்ளார். மேற்படி சம்பவம் குறித்து சிறுமியின் தாய் கவிதா W-15 ராயபுரம் அனைத்து மகளிர் காவல் நிலையத்தில் புகார் கொடுத்தார். இப்புகார் மீது விசாரணை மேற்கொண்டு போக்சோ சட்டப்பிரிவில் வழக்குப் பதிவு செய்யப்பட்டு,கணேசன் கைது செய்யப்பட்டு, நீதிமன்றக் காவலுக்கு உட்படுத்தப்பட்டார்.

இவ்வழக்கு தொடர்பான விசாரணை உயர் நீதிமன்றத்தில் வளாகத்தில் உள்ள போக்சோ சிறப்பு நீதிமன்றத்தில் நடைபெற்று வந்த நிலையில், ராயபுரம் அனைத்து மகளிர் காவல் நிலைய ஆய்வாளர் தலைமையிலான காவல் குழுவினர் முறையாக சாட்சிகளை ஆஜர்படுத்தி வந்த நிலையில் வழக்கு விசாரணை முடிவடைந்து 23.09.2021 அன்று இவ்வழக்கில் தீர்ப்பு வழங்கப்பட்டது.

வழக்கில் கணேசன் மீது குற்றம் நிரூபிக்கப்பட்டதால், குற்றவாளி கணேசனுக்கு (48) 5 ஆண்டுகள் சிறை தண்டனை மற்றும் ரூ.5,000/- அபராதமும், அபராதம் கட்ட தவறினால் மேலும் 1 மாதம் சிறை தண்டனை அனுபவிக்க வேண்டும் என, நீதிபதி தீர்ப்பு வழங்கினார். தொடர்ந்து கணேசன் சிறையில் அடைக்கப்பட்டார்.

இந்த வழக்கில் சிறப்பாக புலனாய்வு செய்து, நீதிமன்ற நடவடிக்கைகளுக்கு சிறப்பு கவனம் செலுத்தி குற்றவாளிக்கு உரிய தண்டனை பெற்று தந்த ராயபுரம் அனைத்து மகளிர் காவல் நிலைய ஆய்வாளர் மற்றும் நீதிமன்ற அலுவல் பணிபுரியும் காவல் குழுவினரை சென்னை பெருநகர காவல் உயரதிகாரிகள் வெகுவாகப் பாராட்டியுள்ளனர்.

Contact Us