காதலிச்சவனே இப்படி பண்ணா எப்படி? 6 மாத கர்ப்பிணி தூக்கிட்டு தற்கொலை..!

காரைக்கால் அருகே கர்ப்பிணி பெண் தூக்கிட்டு தற்கொலை செய்துகொண்ட சம்பவம் அதிர்ச்சியை தந்துள்ளது.

புதுச்சேரியில் வரதட்சணை கேட்டு காதல் கணவன் தொடர்ந்து தொந்தரவு செய்து வந்ததால் கர்ப்பிணி பெண் தூக்கிட்டு தற்கொலை செய்துகொண்ட சம்பவம் சோகத்தை ஏற்படுத்தியுள்ளது.

புதுச்சேரி மாநிலம் காரைக்கால் நேரு நகரைச் சேர்ந்தவர் பாரத். இவர் காதலித்து வந்த வினோதா என்பவரை கடந்த 2 வருடங்களுக்கு முன்பு திருமணம் செய்துகொண்டார். இந்நிலையில் 6 மாத கர்ப்பிணியாக இருந்த வினோதாவிடம் வரதட்சணை கேட்டு பாரத் மற்றும் அவரது வீட்டார் தொடர்ந்து தொந்தரவு செய்து வந்ததாக கூறப்படுகிறது.

இதனால் வினோதா மன உளைச்சலில் இருந்து வந்துள்ளார். இந்த சூழலில் வினோதா கடந்த மாதம் 29ம் தேதி வீட்டில் தூக்கிட்டு தற்கொலை செய்துகொண்டார். சம்பவம் அறிந்து வந்த போலீசார் வினோதாவின் சடலத்தை கைப்பற்றி மாவட்ட அரசு மருத்துவமனைக்கு அனுப்பி வைத்தனர்.

தொடர்ந்து இதுகுறித்து வினோதாவின் வீட்டார் காவல் நிலையத்தில் புகார் கொடுத்ததன் பேரில் விசாரணை மேற்கொண்ட போலீசார் பாரத், அவரது தாய் ஜோதி, அக்கா பரிமளா மூவர் மீதும் வழக்கு பதிவு செய்து கைது செய்தனர்.

தமிழகத்தில் வரதட்சணை கொடுமையால் புதுப்பெண்கள் தற்கொலை செய்துகொள்ளும் சம்பவங்கள் அதிகரித்து வருவதால் குற்றங்களுக்கு எதிராக கடுமையான தண்டனையை விதிக்க சமூக ஆற்வளர்களும், பெண்கள் அமைப்பும் கோரிக்கை வைத்துள்ளனர்.

Contact Us