பிஎஸ்பிபி பள்ளி ஆசிரியர் பாலியல் வழக்கு: குற்றப்பத்திரிகை தாக்கல்!

பத்மா சேஷாத்ரி பள்ளி மாணவிக்கு பாலியல் தொல்லை கொடுத்த விவகாரத்தில் ஆசிரியர் ராஜகோபாலன் மீதான குற்றப்பத்திரிகை தாக்கல் செய்யப்பட்டுள்ளது.

சென்னை கே.கே.நகரில் செயல்பட்டுவரும் பத்மா சேஷாத்ரி பள்ளியில் பணியாற்றும் ஆசிரியர் ராஜகோபாலன், மாணவிகளுக்கு பாலியல் தொந்திரவு அளித்ததாக புகார் எழுந்தது. இதனைத் தொடர்ந்து, கடந்த மே மாதம் 24 ஆம் தேதி அசோக் நகர் போலீசார், அந்த பள்ளியின் முன்னாள் மாணவி அளித்த பாலியல் தொந்தரவு புகாரின் அடிப்படையில் ஆசிரியர் ராஜகோபாலன் மீது போக்சோ பிரிவு உள்ளிட்ட 6 பிரிவுகளின் கீழ் அவர் மீது வழக்குப்பதிவு செய்து ராஜகோபலனை கைது செய்தனர்.

 

ராஜகோபாலனிடம் போலீசார் விடிய விடிய நடத்திய விசாரணையில் கடந்த 5 ஆண்டுகளாக 11,12ஆம் வகுப்பு மாணவிகளிடம் பாலியல் தொந்தரவில் ஈடுபட்டது அம்பலமானதாகவும், பள்ளியில் தன்னைப் போன்று மேலும் சில கருப்பு ஆடுகள் உள்ளதாக ராஜகோபாலன் கூறியதாகவும் போலீசார் தகவல் தெரிவித்தனர்.

இதனைத் தொடர்ந்து சென்னை மாநகர காவல் ஆணையரின் உத்தரவுப்படி கடந்த ஜூன் மாதம் 25ஆம் தேதி ஆசிரியர் ராஜகோபாலன் மீது குண்டர் சட்டம் பாய்ந்தது. இதனிடையே, கடும் நெருக்கடிக்கு பின்னர், பத்மா சேஷாத்ரி பள்ளி நிர்வாகம் அவரை பணியிடை நீக்கம் செய்தது.

இந்த நிலையில், இந்த விவகாரம் தொடர்பாக 17 சாட்சிகளிடம் விசாரணை நடத்திய அசோக் நகர் மகளிர் காவல் நிலைய போலீசார், ஆசிரியர் ராஜகோபாலன் மீதான குற்றப்பத்திரிகையை நீதிமன்றத்தில் தாக்கல் செய்துள்ளனர். இது விரைவில் விசாரணைக்கு எடுத்துக் கொள்ளப்படும் எனவும் போலீசார் தெரிவித்துள்ளனர்.

Contact Us