கிருஷ்ணகிரியில் கைக்குழந்தையுடன் தாய் கிணற்றில் குதித்து தற்கொலை: என்ன காரணம்!

கிருஷ்ணகிரி மாவட்டத்தில் கைக்குழந்தையுடன் தாய் கிணற்றில் குதித்து தற்கொலை செய்து கொண்டது சோகத்தை ஏற்படுத்தியுள்ளது

கிருஷ்ணகிரி மாவட்டம் அஞ்செட்டி அருகே நாற்றம் பாளையம் மேட்டுக்கொட்டாய் கிராமத்தைச் சேர்ந்தவர் வெங்கடேஷ். இவருக்கும் உரிகம் கிராமத்தை சேர்ந்த தீபா என்பவருக்கும் கடந்த 5 ஆண்டுகளுக்கு முன்பு திருமணம் நடைபெற்றது. இவர்களுக்கு வர்மிதா (3), தனுஸ்ரீ 7 மாதம் ஆகிய இரு பெண் குழந்தைகள் உள்ளனர்.

இந்த நிலையில், கணவன் மனைவி இடையே அடிக்கடி தகராறு ஏற்பட்டு வந்ததாக தெரிகிறது. இதனால் கோபமடைந்த தீபா கைக்குழந்தையுடன் திடீரென்று மாயமானார். இதையடுத்து, அவர்களை குடும்பத்தினர் எங்கும் தேடியும் கிடைக்கவில்லை.

இதற்கிடையே, மேட்டு கொட்டாய் கிராமத்தில் விவசாய நிலத்தில் உள்ள கிணற்றில் தீபா மற்றும் குழந்தை தனுஸ்ரீ இருவரும் கிணற்றில் பிணமாக மிதந்துள்ளனர். இதனை பார்த்து அதிர்ச்சியடைந்த கிராம மக்கள் இதுகுறித்து அஞ்செட்டி போலீசுக்கு தகவல் தெரிவித்துள்ளனர்.

தகவலின் பேரில் சம்பவ இடத்துக்கு வந்த போலீசார், தாய் மகள் இருவரின் உடலை மீட்டு பிரேத பரிசோதனைக்காக தர்மபுரி அரசு மருத்துவமனைக்கு அனுப்பி வைத்துள்ளனர். தனது மகள் வரதட்சனை கொடுமையால் கொலை செய்யப்பட்டிருக்கலாம். இது தற்கொலை அல்ல என சந்தேகம் தெரிவித்து தீபாவின் தந்தை கிருஷ்ணன் புகார் அளித்துள்ளார்.

இதுகுறித்து வழக்குப்பதிவு செய்துள்ள போலீசார் விசாரணை மேற்கொண்டு வருகின்றனர். திருமணமாகி 5 ஆண்டுகளே ஆவதால் சப் கலெக்டர் நேரில் விசாரணை செய்து வருகிறார் என்பது குறிப்பிடத்தக்கது.

Contact Us