கொரோனா தடுப்பூசி போட்டால் எய்ட்ஸ்? – அதிபர் பேசிய வீடியோ அதிரடி நீக்கம்!

கொரோனா தடுப்பூசி குறித்து தவறான தகவல் தெரிவித்ததாகக் கூறி, பிரேசில் அதிபர் ஜெய்ர் போல்சனாரோ பேசிய வீடியோவை, சமூக வலைதள நிறுவனங்களான பேஸ்புக், யூ டியூப் ஆகியவை நீக்கி உள்ளன.

தென் அமெரிக்க நாடான பிரேசில் நாட்டு அதிபர் ஜெய்ர் போல்சனாரோ, இதுவரை கொரோனா தடுப்பூசி போட்டுக் கொள்ளவில்லை. மேலும் கொரோனா தடுப்பூசி குறித்து சர்ச்சைக்குரிய கருத்துக்களைத் தெரிவித்து வருகிறார். இதனால், பிரேசில் அதிபர் ஜெய்ர் போல்சனாரோவை உலக சுகாதார அமைப்பும் கடுமையாக விமர்சித்து வருகிறது. மேலும், கொரோனா தடுப்பு மருந்தைப் போட்டுக் கொண்டால், நீங்கள் முதலையாகவும் மாறலாம், பெண்களுக்கு தாடி வளரலாம் போன்ற கருத்துகளையும், அதிபர் ஜெய்ர் போல்சனாரோ பொது வெளியில் தெரிவித்தார்.

இந்நிலையில், கொரோனா தடுப்பூசி செலுத்திக் கொண்டால், எய்ட்ஸ் நோய் தாக்கும் என்று, பிரேசில் அதிபர் ஜெய்ர் போல்சனாரோ சர்ச்சை கருத்து ஒன்றை தெரிவித்தார். இது, பெரும் பரபரப்பை ஏற்படுத்தியது. இதைத் தொடர்ந்து, கொரோனா தடுப்பூசி குறித்து பொய்யான தகவலை பரப்பியதாகக் கூறி, அதிபர் ஜெய்ர் போல்சனாரோ பேசிய வீடியோவை பேஸ்புக், யூ டியூப் நிறுவனங்கள் நீக்கி உள்ளன.

இது குறித்து விளக்கமளித்துள்ள பேஸ்புக் மற்றும் யூடியூப் நிறுவனங்கள், கொரோனா தடுப்பூசி குறித்த தங்கள் கொள்கைகளுக்கு எதிராக இருந்ததால் பதிவு நீக்கப்பட்டதாக தெரிவித்து உள்ளன. கொரோனா தடுப்பூசி செலுத்தினால் எய்ட்ஸ் நோய் தாக்கும் என்று பொய்யான தகவலை பரப்பிய பிரேசில் அதிபர் ஜெய்ர் போல்சனாரோவுக்கு கண்டனங்கள் வலுத்து வருகின்றன.

Contact Us