பெண்களை விற்கும் அவலம் – உணவுப் பற்றாக்குறையால் கொடுமை!

உணவுப் பற்றாக்குறையால் மகள்களையே விற்பனை செய்யும் அவல நிலையில் ஆப்கன் குடும்பங்கள்.
ஆப்கானிஸ்தானில் உணவுக்கு கடும் நெருக்கடி உருவாகியுள்ளதாக தகவல் வெளியாகியுள்ளது. ஆப்கானிஸ்தானில் பாதி நாடு மிகக் கடுமையான உணவுத் தட்டுப்பாட்டை சந்தித்து வருவதாக ஐநா ஏஜென்சிகள் எச்சரித்துள்ளன.

வரும் குளிர் காலத்தில் ஆப்கானிஸ்தானில் 2.2 கோடிக்கு மேற்பட்ட மக்கள் உணவுத் தட்டுப்பாட்டை சந்திப்பார்கள் என ஐநா ஏஜென்சிகள் எச்சரித்துள்ளன. கடந்த ஆகஸ்ட் மாதம் ஆப்கானிஸ்தானில் தாலிபான்கள் ஆட்சியைப் பிடித்தனர்.

தாலிபான்கள் திடீரென ஆட்சியைப் பிடித்ததால் பல்வேறு சீர்கேடுகள் ஏற்பட்டதாக கூறப்படுகிறது. இதுமட்டுமல்லாமல், காலநிலை மாற்றத்தால் பயங்கர வறட்சியும் ஏற்பட்டது. இதன் விளைவாக ஆப்கன் மக்கள் உணவுப் பற்றாக்குறையை எதிர்நோக்கியுள்ளனர்.

இதுகுறித்து உலக உணவுத் திட்டத்தின் தலைமை இயக்குநர் டேவிட் பீஸ்லி, “இந்த குளிர்காலத்தில் பல லட்சக்கணக்கான ஆப்கன் மக்கள் உணவுக்காக புலம்பெயருவார்கள் அல்லது பசியால் வாடுவார்கள். மக்களின் உயிரைக் காப்பாற்ற நாம் உதவி வழங்க வேண்டும்.

ஆப்கானிஸ்தான் தற்போது உலகிலேயே மிக மோசமான நெருக்கடியை சந்தித்து வருகிறது. உணவுப் பற்றாக்குறையால் எல்லாம் மோசமாகிவிடும். நேரம் நெருங்கிக்கொண்டே இருக்கிறது. நாம் உடனடியாக செயல்படாவிட்டால் பேரழிவைச் சந்திப்போம்” என்று தெரிவித்துள்ளார்.

ஏற்கெனவே மேற்கு ஆப்கானிஸ்தானில் ஆயிரக்கணக்கான ஏழைக் குடும்பங்கள் தங்களது கால்நடைகள், உடைமைகளை விற்று உதவி கேட்டு பெருநகரங்களுக்கு அருகே முகாமிட்டுள்ளனர்.

ஹெராட், பட்கிஸ் போன்ற பகுதிகளில் உணவுக்கு வழியில்லாமல் பெற்றோர் தங்களது இளம் மகள்களை திருமணத்துக்காக விற்பனை செய்ய வேண்டிய அவல நிலையும் உருவாகியுள்ளது.

இதுகுறித்து தாலிபான் செய்தித்தொடர்பாளர் சபிகுல்லா முஜாஹித், “தற்போதைய சூழலில் இருந்து மக்களை வெளியே கொண்டுவர முயற்சித்து வருகிறோம். சர்வதேச உதவியும் வந்துள்ளது. உணவு, ஆடை போன்றவற்றை விநியோகிக்க ஏற்பாடு செய்துள்ளோம். எல்லா பிரச்சினைகளும் சரியாகிவிடும்” என்று தெரிவித்துள்ளார்.

Contact Us