ஆர்யன் கானுக்கு ஜாமீன்: மும்பை உயர் நீதிமன்றம் உத்தரவு!

போதை பொருள் வழக்கில் கைதான ஆர்யன் கானுக்கு ஜாமீன் வழங்கி மும்பை உயர் நீதிமன்றம் உத்தரவிட்டுள்ளது
மும்பை சொகுசுக் கப்பலில் நடைபெற்ற கேளிக்கை விருந்தின்போது போதைப்பொருள் மும்பை சொகுசுக் கப்பலில் நடைபெற்ற கேளிக்கை விருந்தின்போது போதைப்பொருள் பயன்படுத்தியதாக பாலிவுட் நடிகர் ஷாருக்கான் மகன் ஆர்யன் கான் உள்பட 8 பேரை என்.சி.பி. அதிகாரிகள் கைது செய்தனர். இந்த வழக்கு தொடர்பாக மொத்தம் 17 பேர் இதுவரை கைது செய்யப்பட்டுள்ளனர்.

இந்த வழக்கில் கைது செய்யப்பட்ட ஷாருக்கான் மகன் ஆர்யன் கான், அர்பாஸ் மெர்ச்சண்ட், முன்முன் தமேச்சா உள்ளிட்டோர் நீதிமன்றக் காவலில் சிறையில் அடைக்கப்பட்டனர். இதனிடையே, வழக்கில் தனக்கு ஜாமீன் கோரி ஆர்யன் கான் தரப்பில் மும்பை செஷன்ஸ் நீதிமன்றத்தில் வழக்கு தொடரப்பட்டது. வழக்கை விசாரித்த நீதிமன்றம் அவருக்கு ஜாமீன் வழங்க மறுப்பு தெரிவித்தது.

ஜாமீன் கோரி தொடரப்பட்ட வழக்கில், ஆர்யன் கானை முதன்மைக் குற்றவாளியாக சேர்த்துள்ள என்சிபி, ஆர்யனின் வாட்ஸ் அப் சாட்கள் சர்வதேச போதைப் பொருள் கடத்தல்காரர்களைத் தொடர்பு கொண்டு அவர்கள் மூலம் ஆர்யன் கான் போதைப் பொருளை பெற்றது உறுதியாகியுள்ளது. அவரை வெளியில்விட்டால் அவர் தனது அதிகாரமிக்க பின்புலத்தைப் பயன்படுத்தி சாட்சிகளைக் கலைத்துவிடுவார் என்று வாதிட்டது.

மேலும், ஆரியன் கான் போதைப்பொருள் தொடர்ந்து பயன்படுத்தும் பழக்கம் உடையவர் என விசாரணையின் போது தெரியவந்ததாக என்.சி.பி., தெரிவித்த நிலையில், அதற்கான ஆதாரங்களையும் என்.சி.பி., தரப்பு நீதிமன்றத்தில் அளித்தது. அதேசமயம், அதானியின் துறைமுகத்தில் பிடிப்பட்ட போதைப் பொருள் தொடர்பான விவகாரத்தை மூடி மறைக்கவே ஆர்யன் கான் விவகாரத்தை மத்திய அரசு கையில் எடுத்ததாக எதிர்க்கட்சிகள் குற்றம் சாட்டின.

இதுபோன்ற காரணங்களால் ஆர்யன் கானுக்கு இரண்டு முறை ஜாமீன் மறுக்கப்பட்டது. தொடர்ந்து, அவருக்கு ஜாமீன் கிடைப்பதில் இழுபறி நீடித்து வந்த நிலையில், அவரை வெளியே கொண்டு வருவதற்கான சட்டப் போராட்டங்களை அவரது தந்தையும் நடிகருமான ஷாருக்கான் மேற்கொண்டு வந்தார்.

இந்த நிலையில், ஆர்யன் கானுக்கு ஜாமீன் கோரி மும்பை உயர் நீதிமன்றத்தில் தொடரப்பட்ட வழக்கை விசாரித்த நீதிமன்றம், அவருக்கு ஜாமீன் வழங்கி உத்தரவிட்டது. அவருடன் சேர்ந்து அவரது நண்பர்கள் இருவருக்கும் ஜாமீன் கிடைத்துள்ளது. இதன் மூலம், 21 நாட்கள் சிறையில் இருந்த ஆர்யன் விரைவில் வெளியே வரவுள்ளார். இது அவரது குடும்பத்தினரை மகிழ்ச்சியில் ஆழ்த்தியுள்ளது.

Contact Us