பெண் எஸ்.பி., பாலியல் வழக்கு: 4 மணி நேரம் சாட்சியம்!

விழுப்புரம் தலைமை குற்றவியல் நடுவர் நீதிமன்றத்தில் பாதிக்கப்பட்ட பெண் எஸ்.பி., சுமார் 4 மணி நேரம் சாட்சியம் அளித்துள்ளார்

முன்னாள் தமிழக முதலமைச்சர் எடப்பாடி பழனிசாமி வடமாவட்டங்களில் சுற்றுப்பயணம் மேற்கொண்ட போது முதலமைச்சரின் சட்டஒழுங்கு பாதுகாப்பு பணியில் ஈடுபட்டிருந்த சிறப்பு டிஜிபி ராஜேஷ் தாஸ் பெண் ஐபிஎஸ் அதிகாரியிடம் பாலியல் சீண்டலில் ஈடுபட்டதாக அவர் புகார் அளித்தார்.

அதன்பேரில் இவ்வழக்கு விசாரணையை சிபிசிஐடி போலீசார் மேற்கொண்டு வருகின்றனர். வழக்கு தொடர்பான விசாரணை விழுப்புரம் நீதிமன்றத்தில் நடைபெற்று வருகிறது. இதனிடையே, 3 மாதத்திற்குள் வழக்கினை விழுப்புரம் நீதிமன்றம் முடித்து வைக்க வேண்டுமென விழுப்புரம் நீதிமன்றத்திற்கு சென்னை உயர் நீதிமன்றம் உத்தரவிட்டுள்ளது.

இந்த நிலையில், விழுப்புரம் தலைமை குற்றவியல் நடுவர் நீதிமன்ற நீதிபதி கோபிநாதன் பாதிக்கப்பட்ட பெண் எஸ்.பி., சுமார் 4 மணி நேரம் சாட்சியம் அளித்துள்ளார். காலையில் ஆஜரான பெண் எஸ்.பி., முதலில் 30 நிமிடங்கள் சாட்சி அளித்தார். உணவு இடைவெளிக்கு பின்னர் பிற்பகல் 2.10 மணி முதல் மாலை 5.40 மணி வரை அவர் சாட்சியம் அளித்துள்ளார். தொடர்ந்து, நாளையும் அவர் சாட்சி அளிக்கவுள்ளதாக தெரிவிக்கப்பட்டுள்ளது.

முன்னதாக, இந்த வழக்கில் ஆஜராகாத ராஜேஷ் தாஸுக்கு பிடிவாரண்ட் பிறப்பிக்கப்படும் என நீதிமன்றம் எச்சரிக்கை விடுத்ததையடுத்து, அவர் நீதிமன்றத்தில் ஆஜரானார் என்பது குறிப்பிடத்தக்கது.

Contact Us