சூர்யா படம் ஓடினால் தியேட்டர்களை கொளுத்துவோம்- காடுவெட்டி மனோஜ் எச்சரிக்கை

நடிகர் சூர்யா வன்னியர் சமுதாய மக்களிடம் மன்னிப்பு கேட்காவிட்டால் தமிழகத்தில் நடமாட முடியாது என்று காடுவெட்டி குரு மருமகன் மிரட்டியுள்ளார்.
இருளர் சமுதாயத்தைச் சேர்ந்த ராஜாக்கண்ணுவை காவல் நிலையத்தில் வைத்து கொன்ற உண்மை நிகழ்வினை மையமாக வைத்து எடுக்கப்பட்ட படம் ஜெய்பீம். இந்த படம் ஓடிடியில் ரிலீசாகி ரசிகர்கள், திரை துறையினர் மற்றும் அரசியல் கட்சியினரிடையே பாராட்டுகளை குவித்துள்ளது. ஜெய்பீம் போன்ற படத்தை எடுத்து நடித்ததற்கு நடிகர் சூர்யாவுக்கு தமிழகம் மட்டுமில்லாமல் ஆந்திரா, கேரளா, கர்நாடக உள்ளிட்ட மாநிலங்களில் உள்ள ரசிகர்களிடம் இருந்து பெரும் வரவேற்பு கிடைத்துள்ளது.

இந்நிலையில், படைப்புச் சுதந்திரம் என்ற பெயரில் ஜெய்பீம் படத்தில் வன்னியர் சமுதாயத்தை இழிவு படுத்தியுள்ளதாக அன்புமணி ராமதாஸ், காடுவெட்டி குருவின் மருமகன் மனோஜ் உள்ளிட்டோர் எதிர்ப்பு தெரிவித்துள்ளனர்.

இதுகுறித்து காடுவெட்டி மனோஜ் அளித்துள்ள பேட்டியில் கூறியதாவது, ஜெய்பீம் மக்களுக்கு தேவையான திரைப்படம்தான் இருளர் சமுதாயம் எந்த அளவிற்கு ஒடுக்கப்பட்டுள்ளனர் என்பதை எடுத்து காட்டியுள்ளனர். ஆனால், உண்மை கதை என்றுசொல்லிவிட்டு சம்மந்தமே இல்லாத வில்லனை வன்னியர் சமூகத்தைச் சார்ந்தவராக காட்டியுள்ளனர். ராஜாக்கண்ணு என்ற பழங்குடியினரை கொலை செய்த காவல் சார்பு ஆய்வாளரின் பெயர் அந்தோணிசாமி என்பது பலரும் அறிந்த உண்மை எனும் நிலையில், அந்த பாத்திரத்திற்கு குருமூர்த்தி என்று பெயர் சூட்டி, வன்னியர் சங்கத்தின் மறைந்த தலைவர் ஜெ.குருவை நினைவுபடுத்தும் வகையில் குரு என்று அழைப்பது ஆகியவையும், இந்த அநீதிகளுக்கு வலு சேர்க்கும் வகையில் அமைக்கப்பட்டுள்ள சில காட்சிகளும் தான் தமிழ்நாட்டில் வாழும் வன்னியர் மக்களை கொந்தளிக்கச் செய்துள்ளன.

அதேபோல், வில்லனாக காட்டியுள்ள போலீசாரின் வீட்டிற்குள் வன்னியர் சங்க காலெண்டரை தொங்கவிட்டுள்ளனர். அந்த காவல் உதவி ஆய்வாளருக்கு குரு என பெயர் வைத்ததற்கு பதிலாக, தீரன் சின்னமலை என்ன பெயர் வைப்பாரா சூர்யா. அப்படி அவர் வைத்திருந்தால் அவரை வீடு புகுந்து அடித்து நாசம் செய்திருப்பார்கள்.

இதற்காக நடிகர் சூர்யா ஒட்டுமொத்த வன்னியர் சமுதாய மக்களிடம் பகிரங்கமாக மன்னிப்பு கேட்க வேண்டும். அப்படி இல்லையென்றால் சூர்யாவின் எந்த படமும் இனி தியேட்டர்களில் ஓட்ட முடியாது. மீறி திரையிட்டால் தியேட்டர்களை கொளுத்துவோம்” என ஆவேசமாக மனோஜ் பேசியிருப்பது பரபரப்பை ஏற்படுத்தியுள்ளது.

Contact Us