கோவையில் புதருக்குள் வைத்து இளம்பெண் கூட்டு பலாத்காரம்..! நீதிமன்றம் ‘சபாஷ்’ தீர்ப்பு

கோவை மாவட்டம் பொள்ளாச்சியில் கணவரை பிரிந்து வாழ்ந்த பெண்ணை கூட்டு பாலியல் பலாத்காரம் செய்த இருவருக்கு தலா 20 ஆண்டு சிறை தண்டனை – தலா 5 ஆயிரம் அபராதம், கோவை மகளிர் நீதிமன்றம் உத்தரவு.

கோவை மாவட்டம், பொள்ளாச்சி வடுகபாளையம் பகுதியை சேர்ந்த 28 வயதான பெண் 2வது கணவரை பிரிந்த தனியாக வாழ்ந்து வருகிறார். இந்நிலையில், கடந்த 2016ம் ஆண்டு, அந்த பெண்ணை கணவருடன் சேர்த்து வைப்பதாக கூறி, அவரது குடும்ப நண்பர்களான விமல்ராஜ், கார்த்திக் ஆகியோர் ஆட்டோவில் அழைத்து சென்றுள்ளனர்.

அப்போது, வடுகபாளையம் வழியில் செல்லும் புத்து மாரியம்மன் கோவில் அருகே புதரில் அந்த பெண்ணை தாக்கி கூட்டு பாலியல் பலாத்காரம் செய்துள்ளனர். இந்த புகார் மீதான வழக்கு கோவை மகளிர் நீதிமன்றத்தில் நடைபெற்று வந்த நிலையில், வழக்கு தொடர்பான இறுதி விசாரணையில் அரசு சார்பில் வழக்கறிஞர் ஜிஷா ஆஜராகினார்.

இந்நிலையில், பெண்ணை தாக்கி கூட்டு பாலியல் பலாத்காரத்தில் ஈடுபட்ட விமல்ராஜ், கார்த்திக் ஆகிய இருவருக்கு தலா 20 ஆண்டு சிறை தண்டனையும், தலா 5 ஆயிரம் அபராதமும் விதித்து மகளிர் நீதிமன்ற நீதிபதி நந்தினி தேவி உத்திரவிட்டார்.

குற்றவாளி கார்த்திக் நீதிமன்றத்தில் ஆஜராகாததால், கார்த்திக்கை காவல்துறையினர் தேடி வருகின்றனர்.

Contact Us