ஓமைக்ரானை விடுங்க.. அடுத்து ஒன்னு வருதாம்.. ரொம்ப மோசமாக இருக்கலாமாம்!

ஓமைக்ரான் வகை கொரோனாவைரஸ் தப்பித் தவறி மைல்டானதாக இருப்பதாக இங்கிலாந்தைச் சேர்ந்த விஞ்ஞானி தெரிவித்துள்ளார்.
ஓமைக்ரான் ரொம்ப மைல்டாக இருப்பதால் நாம் சந்தோஷப்பட்டுக் கொண்டுள்ளோம். உண்மையில் இதற்கு அடுத்து வேறு ஒரு வகை ஓமைக்ரான் வரவுள்ளது. அது அபாயகரமானது என்று இந்தியாவைப் பூர்வீகமாகக் கொண்ட விஞ்ஞானி ஒருவர் எச்சரித்துள்ளார்.

கொரோனாவைரஸின் எந்த வகையுமே மைல்டானதாக இல்லை. ஆனால் ஓமைக்ரான் மட்டும் தப்பித் தவறி மைல்டாக மாறி விட்டது. இதை வைரஸின் “தவறு” என்றுதான் எடுத்துக் கொள்ள வேண்டும் என்றும் அந்த விஞ்ஞானி விளக்கியுள்ளார். ஓமைக்ரான் மட்டும் ஏன் மைல்டானதாக மாறியது என்ற காரணம் தெரியவில்லை என்றும் அவர் கூறுகிறார்.

கேம்பிரிட்ஜ் பல்கலைக்கழகத்தின் கிளினிக்கல் மைக்ரோபயாலஜி துறை பேராசிரியர் ரவீந்திர குப்தா இதுகுறித்து மேலும் கூறுகையில், தற்போது வேகமாக பரவி வரும் ஓமைக்ரான், தப்பிப் பிறந்த கொரோனாவைரஸ் என்றுதான் சொல்ல வேண்டும். இது வேகமாக பரவுகிறது. அந்த வகையில் கொரோனாவைரஸின் செயல்பாடுகள் இதில் முழுமையாக உள்ளது. ஆனால் இது நுரையீரலைப் பெரிதாக பாதிப்பதில்லை. இதனால் நாம் மகிழ்ச்சியாக இருக்கிறோம்.

உண்மை அது இல்லை. இந்த வைரஸின் மரபணு மாற்றம் மிக மோசமான புதிய வகைக்கு வித்திடும் அபாயம் உள்ளது. அந்த வகை, ஓமைக்ரானைப் போலவே மைல்டாக இருக்கும் என்று நினைக்க முடியாது, அப்படி இருக்க வேண்டிய அவசியமும் இல்லை. இதற்கு முந்தைய டெல்லா உள்ளிட்ட வைரஸ்களைப் போலவே இதுவும் வீரியம் மிக்கதாக இருக்கலாம்.

தடுப்பூசி மிகவும் முக்கியமானது. அது வைரஸிடமிருந்து முதல் கட்டப் பாதுகாப்பை நமக்கு வழங்க உதவும். தற்போது ஓமைக்ரான் மைல்டாக இருப்பதால் இந்த சந்தர்ப்பத்தைப் பயன்படுத்தி அனைவருக்கும் தடுப்பூசி போடுவதை விரைவுபடுத்த வேண்டும்.

இந்தியாவில் ஓமைக்ரானின் பாதிப்பு எந்த அளவுக்கு இருக்கும் என்பதை, ஏற்கனவே இது ப ரவிய பிற நாடுகளின் அனுபவங்களை வைத்து நாம் கணிக்க முடியும். முன்னெச்சரிக்கை நடவடிக்கைகளை நாம் எடுத்தாக வேண்டும். பிற நாடுகளுக்கும், இந்தியர்களுக்கும் மரபணு வேறுபாடு இருப்பதையும் அதையும் கவனத்தில் கொண்டாக வேண்டும்.

இருப்பினும் இந்தியாவில் ஏற்கனவே டெல்டா பெரிய அளவில் பரவி இருப்பதால், பலருக்கும் நோய் எதிர்ப்பு சக்தி உருவாகியுள்ளது. தடுப்பூசித் திட்டமும் சிறப்பாக செயல்படுத்தப்பட்டுள்ளது. எனவே ஓமைக்ரானால் பெரிய அளவில் பாதிப்பு ஏற்படும் என அஞ்சத் தேவையில்லை. அதேசமயம், முன்னெச்சரிக்கை நடவடிக்கைகள் தொடர வேண்டும் என்றார் அவர்.

Contact Us