அதிகரிக்கும் கொரோனா: உலோக பெட்டிக்குள் வாழும் சீன மக்கள்!

கொரோனா வைரஸ் பாதித்தவர்களை உலோக பெட்டி முகாம்களில் அந்நாட்டு அரசு அடைத்து வைப்பதாக வீடியோ ஒன்று வைரலாகி வருகிறது
சீனாவை மையமாக கொண்டு உலகம் முழுவதும் பரவியுள்ள கொரோனா கொள்ளை நோயால் சர்வதேச அளவில் 30 கோடிக்கும் அதிகமானோர் பாதிக்கப்பட்டுள்ளனர். இதனிடையே, ஒமைக்ரான் பரவலும் அதிகரித்து வருகிறது. கொரோனா, ஒமைக்ரான் பரவலை கட்டுக்குள் கொண்டு வர உலக நாடுகள் பல்வேறு நடவடிக்கைகளை மேற்கொண்டு வருகின்றன.

சீனாவில் இருந்து பரவியதாக எடுத்துக் கொண்டாலும், கொரோனா முதல் அலையின் போதே அதனை தனக்கே உரித்தான பாணியில் கடுமையான கட்டுப்பாடுகள் மூலம் துரிதமாக கட்டுப்படுத்தியது அந்நாட்டு அரசு. பொதுவாகவே, சீனாவில் கட்டுப்பாடுகள் அதிகமாக இருக்கும் நிலையில், கொரோனா வைரஸ் பாதித்தவர்களை உலோக பெட்டி முகாம்களில் அந்நாட்டு அரசு அடைத்து வைப்பதாக வீடியோ ஒன்று வைரலாகி வருகிறது.

கொரோனா, ஒமைக்ரான் பாதிப்பை கட்டுப்படுத்த அந்நாட்டு அரசு மக்களை கட்டாயப்படுத்தி இதுபோன்று மக்களை அடைத்து வைத்துள்ளதாக குற்றம் சாட்டப்படுகிறது. சீனாவின் பெய்ஜிங் மாகாணத்தில் அடுத்த மாதம் குளிர்கால ஒலிம்பிக் தொடர் நடைபெறவுள்ளது. இதையடுத்து கொரோனா இல்லா சீனா என்ற கொள்கை அடிப்படையில், கொரோனாவை ஒழிக்க லட்சக்கணக்கான மக்களை அந்நாட்டு அரசாங்கம் தனிமைப்படுத்தி வைத்துள்ளதாக கூறப்படுகிறது.

இதற்காக வரிசையாக உலோக பெட்டிகள் கொண்ட முகாம்கள் நாட்டின் பல்வேறு பகுதிகளில் ஏற்பாடு செய்யப்பட்டுள்ளன. கொரோனா பாதித்தவர்கள் பேருந்துகளில் அழைத்து வரப்பட்டு இந்த முகாம்களில் தங்க வைக்கப்படுகின்றானர். சுமார் 2 கோடிக்கும் அதிகமான மக்களை அவர்களது வீடுகளில் தனிமைப்படுத்திக் கொள்ள வேண்டும் எனவும், உணவு வாங்க கூட அவர்கள் வெளியே வரக் கூடாது என்பன உள்ளிட்ட கடுமையான கட்டுப்பாடுகளையும் சீன அரசு விதித்துள்ளதாக தகவல்கள் வெளியாகியுள்ளன.

கர்ப்பிணிகள், பெண்கள், குழந்தைகள், முதியவர்கள் என அனைவரும் ஒரு படுக்கை, கழிப்பறை மட்டுமே உள்ள உலோக பெட்டிகளில் அடைத்து வைக்கப்பட்டுள்ளனர். சீனாவில் யாராவது ஒருவருக்கு கொரோனா ஏற்பட்டால் கூட அந்த பகுதியில் உள்ள மக்கள் அனைவரும் அழைத்து வரப்பட்டு இந்த உலோகப் பெட்டிகளில் 2 வாரம் வரை தனிமைப்படுத்தப்படுவதாக கூறப்படுகிறது. பல பகுதிகளில், நள்ளிரவுக்குப் பிறகு தங்கள் வீடுகளை விட்டு வெளியேறி தனிமைப்படுத்தப்பட்ட மையங்களுக்கு பொதுமக்கள் செல்ல வேண்டும் என உத்தரவிடப்பட்டுள்ளதாகவும் தெரிகிறது.

Contact Us