அபாய கட்டத்தைத் தாண்டினார் ஸ்ரேயஸ் ஐயர்: மகிழ்ச்சியில் ரசிகர்கள்!

ஆஸ்திரேலியாவுக்கு எதிரான ஒருநாள் போட்டியின்போது பீல்டிங்கின்போது காயம் அடைந்து, மருத்துவமனையில் அனுமதிக்கப்பட்ட இந்திய கிரிக்கெட் அணியின் முக்கிய வீரர் ஸ்ரேயஸ் ஐயரின் உடல்நிலை குறித்து, இந்திய T20 கேப்டன் சூர்யகுமார் யாதவ் உறுதியான தகவலை வெளியிட்டுள்ளார்.

ஐயரின் உடல்நிலை இப்போது ஸ்திரமாக (Stable) இருப்பதாக சூர்யகுமார் யாதவ் தெரிவித்துள்ளார்.  “நாங்கள் ஐயருடன் பேசினோம். அவர் இப்போது தனது தொலைபேசியில் பதிலளிக்கிறார் என்றால், அவர் நிச்சயமாக அபாய கட்டத்தைத் தாண்டிவிட்டார் என்று அர்த்தம். அவர் நன்றாக இருக்கிறார், மருத்துவர்கள் அவருக்குச் சிகிச்சை அளித்து வருகின்றனர். அவர் நலமடைந்து வருகிறார்” என அவர் மேலும் தெரிவித்தார்.

ஆஸ்திரேலியாவுக்கு எதிரான 3வது ஒருநாள் போட்டியின்போது கேட்ச் பிடிக்க முயன்ற ஸ்ரேயஸ் ஐயர், கீழே விழுந்ததில் அவரது விலா எலும்புப் பகுதியில் பலத்த அடிபட்டது. உடனடியாக மருத்துவமனைக்குக் கொண்டு செல்லப்பட்டு ஸ்கேன் செய்து பார்க்கப்பட்டதில், அவருக்கு மண்ணீரல் சிதைவு காயம் (Laceration Injury to the Spleen) ஏற்பட்டிருப்பது உறுதி செய்யப்பட்டது. இதனால் உள் இரத்தக் கசிவும் ஏற்பட்டது.

முதல்கட்ட தீவிர சிகிச்சைக்காக ஐசியூ (ICU)-வில் அனுமதிக்கப்பட்டிருந்த ஐயர், தற்போது அங்கிருந்து சாதாரண அறைக்கு மாற்றப்பட்டுள்ளார் என்றும் அவரது உடல்நிலையில் குறிப்பிடத்தக்க முன்னேற்றம் ஏற்பட்டுள்ளதாகவும் பிசிசிஐ (BCCI) தெரிவித்துள்ளது.

தற்போது அவர் சிட்னியிலேயே தொடர்ந்து மருத்துவக் கண்காணிப்பில் இருக்கிறார். ஐயரின் இந்தக் காயம் காரணமாக அவர் சில வாரங்கள் போட்டிகளில் விளையாடாமல் ஓய்வெடுக்க வேண்டியிருக்கும் எனத் தகவல்கள் தெரிவிக்கின்றன.