அணு ஆயுதப் போர் மேகங்கள்? அமெரிக்கா - ரஷ்யா இடையே உச்சகட்ட பதற்றம்!

அணு ஆயுதப் போர் மேகங்கள்? உலகை நடுங்க வைக்கும் 'ஸ்டார்ட்' ஒப்பந்த முடிவு! அமெரிக்கா - ரஷ்யா இடையே உச்சகட்ட பதற்றம்!

உலக நாடுகளை அச்சுறுத்தி வரும் அணு ஆயுதப் போட்டியைக் கட்டுப்படுத்தும் கடைசி கவசமான 'புதிய ஸ்டார்ட்' (New START) ஒப்பந்தம், வரும் பிப்ரவரி 5, 2026 அன்றுடன் முடிவுக்கு வருகிறது. 1972-ம் ஆண்டிலிருந்து அமெரிக்காவும் ரஷ்யாவும் கடைப்பிடித்து வந்த அணு ஆயுதக் கட்டுப்பாட்டு வரலாற்றில், முதன்முறையாக எந்தவித சட்டப்பூர்வ கட்டுப்பாடுகளும் இல்லாத ஒரு அபாயகரமான சூழலை நோக்கி உலகம் நகர்கிறது. 90 சதவீதத்திற்கும் அதிகமான அணு ஆயுதங்களைக் கொண்டுள்ள இவ்விரு நாடுகளும் தங்களின் ஆயுதக் கிடங்குகளைக் கட்டுபாடின்றி விரிவாக்கம் செய்யப் போவது மனிதகுலத்திற்கே விடப்பட்ட சவாலாகப் பார்க்கப்படுகிறது.

அமெரிக்க அதிபர் டொனால்ட் டிரம்ப், இந்த ஒப்பந்தத்தை நீட்டிப்பது குறித்த கேள்விகளைத் தனது வழக்கமான அதிரடி பாணியில் நிராகரித்துள்ளார். "இந்த ஒப்பந்தம் காலாவதியானால் ஆகட்டும், நாம் இதைவிடச் சிறந்த ஒரு புதிய ஒப்பந்தத்தை உருவாக்குவோம்" என்று அவர் கூறியுள்ளார். டிரம்பின் இந்த அலட்சியமான பதில் ரஷ்யாவை மட்டுமல்லாது, அணு ஆயுதப் போட்டியில் வேகமாக வளர்ந்து வரும் சீனாவையும் சீண்டும் விதமாக அமைந்துள்ளதாக அரசியல் ஆய்வாளர்கள் கருதுகின்றனர். பல தசாப்தங்களாகப் பல தூதரக அதிகாரிகளின் கடின உழைப்பில் உருவாக்கப்பட்ட இந்த பாதுகாப்பு கட்டமைப்பு தற்போது சிதைந்து வருகிறது.

மறுபுறம், ரஷ்ய அதிபர் விளாடிமிர் புதின் கடந்த 2025 செப்டம்பர் மாதமே ஒரு முக்கியமான முன்மொழிவை வைத்தார். ஒப்பந்தம் காலாவதியானாலும், 2027 பிப்ரவரி வரை அமெரிக்கா இணங்கினால் ரஷ்யாவும் தானாக முன்வந்து கட்டுப்பாடுகளைக் கடைப்பிடிக்கத் தயார் என்று அறிவித்தார். ஆனால், வாஷிங்டன் இதுவரை இதற்கு முறையான பதிலை அளிக்கவில்லை. உக்ரைன் போர் காரணமாக ஏற்கனவே இரு நாடுகளுக்கும் இடையே பேச்சுவார்த்தைகள் முடங்கியுள்ள நிலையில், அணு ஆயுதக் கட்டுப்பாட்டு மையக் குழுவின் கூட்டங்களும் பல மாதங்களாக நடைபெறவில்லை என்பது நிலைமையை மேலும் சிக்கலாக்கியுள்ளது.

இந்த ஒப்பந்தம் காலாவதியானால் ஏற்படப்போகும் மிகப்பெரிய இழப்பு 'வெளிப்படைத்தன்மை'. இதுவரை இரு நாடுகளின் அணு ஆயுத தளங்களையும் மற்ற நாட்டு அதிகாரிகள் நேரடியாகச் சென்று ஆய்வு செய்யும் வசதி இருந்தது. இனி அத்தகைய சோதனைகள் இருக்காது என்பதால், யார் எவ்வளவு சக்திவாய்ந்த ஏவுகணைகளை வைத்துள்ளனர் என்பது மர்மமாகவே இருக்கும். இது நாடுகளுக்கு இடையே தேவையற்ற சந்தேகத்தையும், ஒருவரையொருவர் மிஞ்ச வேண்டும் என்ற புதிய ஆயுதப் போட்டியையும் (Arms Race) உருவாக்கும் என்று அஞ்சப்படுகிறது.

தற்போது சீனா தனது அணு ஆயுத வலிமையை 1,000 வார்டெட்கள் (Warheads) வரை உயர்த்தத் திட்டமிட்டு வரும் சூழலில், அமெரிக்காவும் ரஷ்யாவும் கட்டுப்பாடுகளைத் தளர்த்துவது உலக அமைதிக்கு மிகப்பெரிய அச்சுறுத்தலாகும். நவீன காலத்தின் ஹைப்பர்சோனிக் ஏவுகணைகள் மற்றும் விண்வெளி ஆயுதங்கள் எனப் புதிய தொழில்நுட்பங்கள் வளர்ந்து வரும் வேளையில், பழைய ஒப்பந்தங்கள் மறைந்து புதிய எல்லைகள் வகுக்கப்படாதது 'மூன்றாம் உலகப் போர்' குறித்த அச்சத்தை மக்களிடையே விதைத்துள்ளது.