இந்தோனேசியா முழுவதும் வெடித்துக் கிளம்பியுள்ள மக்களின் தொடர் போராட்டங்களால், அதிபர் பிரபோவோ சுபியான்டோ (Prabowo Subianto), தனது முக்கியமான சீனப் பயணத்தை ரத்து செய்துள்ளார்! உலக அரசியல் அரங்கில் இந்த முடிவு பெரும் அதிர்ச்சியை ஏற்படுத்தியுள்ளது.
ஜனநாயக ரீதியில் மக்களின் குரலுக்கு மதிப்பளிப்பதாகக் கூறி, அதிபர் சீனப் பயணத்தை ரத்து செய்துள்ளார். ஆனால், உண்மையில் நிலைமை என்ன?
இந்தோனேசியாவில் கடந்த சில நாட்களாக மக்கள், நாடாளுமன்ற உறுப்பினர்களின் ஊதிய உயர்வு மற்றும் ஒரு ஓட்டுநர் காவல்துறை வாகனத்தால் கொல்லப்பட்ட சம்பவத்தைக் கண்டித்து தொடர் போராட்டங்களை நடத்தி வருகின்றனர். தலைநகர் ஜகார்த்தா மட்டுமல்லாமல், நாட்டின் பல்வேறு நகரங்களிலும் போராட்டங்கள் தீவிரமடைந்துள்ளன. சில இடங்களில் வன்முறை வெடித்தது. இதனால், அதிபர் தனது சொந்த நாட்டிலேயே இருக்க வேண்டிய கட்டாயம் ஏற்பட்டுள்ளது.
சீன அதிபர் ஜி ஜின்பிங் (Xi Jinping) விடுத்த அழைப்பின் பேரில், இரண்டாம் உலகப் போரில் வெற்றி பெற்றதன் 80-வது ஆண்டுவிழா கொண்டாட்டங்களில் கலந்துகொள்ள பிரபோவோ சுபியான்டோ செப்டம்பர் 3ஆம் தேதி பெய்ஜிங் செல்லவிருந்தார். இந்த பயணம் இரு நாடுகளுக்கும் இடையே புதிய வர்த்தக மற்றும் ராணுவ உறவுகளை மேம்படுத்தும் என எதிர்பார்க்கப்பட்டது.
ஆனால், உள்நாட்டில் ஏற்பட்ட கொந்தளிப்பு அதிபரின் திட்டத்தை முழுமையாக மாற்றியமைத்துள்ளது. அதிபர் வெளிநாடு சென்றால், போராட்டம் மேலும் தீவிரமடையும் என்ற அச்சத்தால், இந்த திடீர் முடிவு எடுக்கப்பட்டுள்ளது. இந்தோனேசியாவின் புதிய தலைவருக்கு இது ஒரு மிகப்பெரிய சோதனையாக பார்க்கப்படுகிறது. இந்தோனேசிய மக்கள் தங்கள் கோரிக்கைகளுக்காகத் தெருவில் இறங்கிப் போராடும்போது, அதிபர் வெளிநாட்டில் இருப்பது அரசியல் ரீதியாக அவருக்குப் பாதகத்தை ஏற்படுத்தும் என்ற காரணத்தாலேயே இந்த முடிவு எடுக்கப்பட்டதாக அரசியல் நோக்கர்கள் கருதுகின்றனர்.
