தியான்ஜின்: சீனாவின் தியான்ஜின் நகரில், உலக நாடுகளைப் பிளக்கும் அமெரிக்காவின் நேட்டோ கூட்டமைப்புக்கு எதிரான ஷாங்காய் ஒத்துழைப்பு அமைப்பின் (SCO) மாநாடு, உலக அரசியலில் ஒரு புதிய திருப்புமுனையை ஏற்படுத்தியுள்ளது. இந்த மாநாட்டில் இந்தியப் பிரதமர் நரேந்திர மோடியும், ரஷ்ய அதிபர் விளாடிமிர் புதினும் கைகோர்த்து சிரித்தபடி சென்ற காட்சி உலகை உற்றுநோக்கச் செய்துள்ளது.
புதிய உலக ஒழுங்கை உருவாக்கும் நோக்குடன் சீன அதிபர் ஜி ஜின்பிங் ஏற்பாடு செய்த இந்த உச்சி மாநாட்டில், புதின் மிகுந்த உற்சாகத்துடன் காணப்பட்டார். அவர் மாநாட்டிற்கு வந்தபோது, ஜி ஜின்பிங் அவரை அன்புடன் வரவேற்றது, சீனாவுக்கும் ரஷ்யாவுக்கும் இடையிலான நெருக்கமான உறவை வெளிப்படுத்தியது.
மிக முக்கியமாக, பிரதமர் மோடியும் புதினும் கைகோர்த்து ஒன்றாக மாநாட்டிற்குள் நுழைந்த காட்சி, இந்த மூன்று நாடுகளும் இணைந்து ஒரு புதிய வல்லமை மையத்தை உருவாக்குவதற்கான சமிக்ஞையாகக் கருதப்படுகிறது. குறிப்பாக, உக்ரைன் போருக்குப் பிறகு மேற்கத்திய நாடுகள் ரஷ்யாவை தனிமைப்படுத்த முயலும் சூழலில், புதின் மோடியுடன் இணைந்து வெளிப்படுத்திய நட்பு, ரஷ்யாவிற்கு கிடைத்த பெரும் ராஜதந்திர வெற்றியாக பார்க்கப்படுகிறது.
இந்த உச்சி மாநாடு, அமெரிக்காவின் ஆதிக்கத்தை எதிர்க்கும் ஒரு புதிய கூட்டணியை உருவாக்குவதற்கான தளமாக பார்க்கப்படுகிறது. ரஷ்யா, இந்தியா, சீனா ஆகிய மூன்று வல்லரசு நாடுகளின் இந்த நெருக்கமான சந்திப்பு, அமெரிக்கா தலைமையிலான உலக ஒழுங்கிற்கு ஒரு பெரும் சவாலாக அமையும் என அரசியல் ஆய்வாளர்கள் கருத்து தெரிவித்துள்ளனர்.
மாநாட்டின்போது, புதினுடன் தனிப்பட்ட சந்திப்பையும் பிரதமர் மோடி நடத்தினார். அப்போது, இரு நாடுகளுக்கும் இடையிலான உறவுகளை மேலும் வலுப்படுத்துவது குறித்து விவாதித்தனர். இந்த சந்திப்பு, அமெரிக்காவின் கடும் அழுத்தம் இருந்தபோதிலும், ரஷ்யாவுடனான இந்தியாவின் உறவு எந்த வகையிலும் பாதிக்கப்படாது என்பதை மீண்டும் நிரூபித்துள்ளது.
