பிரபல நடிகை சமந்தா, ‘குஷி’ படத்திற்குப் பிறகு தனது சினிமா பயணம் குறித்து வெளிப்படையாகப் பேசியுள்ளார். தான் இனி சக நடிகைகளுடன் போட்டியிட விரும்பவில்லை என்றும், தன் மனதுக்குப் பிடித்த படங்களில் மட்டுமே கவனம் செலுத்தப் போவதாகவும் கூறியுள்ளார்.
சமந்தா அண்மையில் டெல்லியில் நடந்த நிகழ்ச்சி ஒன்றில் கலந்துகொண்டபோது, இந்த மனமாற்றம் குறித்து பேசினார். “முன்பு ஒரு வருடத்தில் ஐந்து படங்களில் நடிப்பதே ஒரு வெற்றிகரமான நடிகைக்கான அடையாளமாக கருதப்பட்டது. ஆனால் கடந்த இரண்டு வருடங்களாக பெரிய படங்கள் எதுவும் வெளியாகவில்லை. ஆயிரம் கோடி ரூபாய் வசூல் செய்த படங்களும் இல்லை. ஆனால், என் வாழ்க்கையில் நான் இதற்கு முன் எப்போதும் இல்லாத அளவுக்கு மகிழ்ச்சியாக இருக்கிறேன்,” என்று அவர் தெரிவித்தார்.
மேலும், “சினிமா உலகில் யாருடனும் போட்டி போட வேண்டும் என்ற எண்ணம் இப்போது இல்லை. பாக்ஸ் ஆபிஸ் வசூல்தான் என் வெற்றிக்கு அளவுகோல் இல்லை” என்றும் சமந்தா கூறினார்.
சமந்தாவின் இந்த வெளிப்படையான கருத்துகள், அவரது ரசிகர்கள் மத்தியில் பெரும் வரவேற்பைப் பெற்றுள்ளன. உடல்நலப் பிரச்சினைகள் மற்றும் தனிப்பட்ட வாழ்க்கையில் ஏற்பட்ட சவால்களுக்குப் பிறகு, சமந்தா தனது வாழ்க்கையில் ஒரு புதிய பாதையைத் தேர்ந்தெடுத்துள்ளார் என்பது இதன் மூலம் தெரிகிறது. இனி அவர் நடிப்பில் மட்டுமின்றி, தயாரிப்பாளராகவும் தனது ‘டிராலலா மூவிங் பிக்சர்ஸ்’ நிறுவனம் மூலம் புதிய பயணத்தைத் தொடங்க உள்ளார்.
