சாலி கிர்க்கின் படுகொலைக்குப் பிறகு, இருண்ட அல்லது பிரகாசமான எதிர்காலத்தைத் தேர்ந்தெடுப்பதற்கான “நமது தருணம்” இது என்று உட்டாவின் ஆளுநர் ஸ்பென்சர் காக்ஸ் கூறியுள்ளார்.
அமெரிக்காவில் அரசியல் வன்முறையின் அச்சுறுத்தலுக்குப் பதிலளிக்கும் விதமாக, உட்டா மாநில ஆளுநர் ஸ்பென்சர் காக்ஸ், சமீபத்தில் சுட்டுக் கொல்லப்பட்ட பழமைவாத ஆர்வலர் சார்லி கிர்க்கின் மரணத்தைப் பற்றி உணர்ச்சிப்பூர்வமான கருத்துக்களை வெளியிட்டார்.
சார்லி கிர்க்கின் படுகொலை “நமது அமெரிக்க சோதனையின் மீதான தாக்குதல்” என்றும், “நமது இலட்சியங்களின் மீதான தாக்குதல்” என்றும் காக்ஸ் கூறினார். இது ஒரு தனிநபரின் மீதான தாக்குதல் மட்டுமல்ல, அமெரிக்காவின் அஸ்திவாரத்தின் மீதான தாக்குதல் என்றும் அவர் குறிப்பிட்டார்.
இந்த தருணம், நாட்டில் பிரிவினையையும் வன்முறையையும் மேலும் அதிகரிக்கச் செய்வதா அல்லது அதிலிருந்து விலகிச் செல்வதற்கான ஒரு வழியைக் கண்டுபிடிப்பதற்கானதா என்று காக்ஸ் கேள்வியெழுப்பினார். இது நமது தேர்வு என்று அவர் அழுத்தமாகக் கூறினார்.
வன்முறைக்கு வன்முறையாலும் வெறுப்புக்கு வெறுப்பாலும் பதிலளிப்பது என்பது ஒரு முடிவற்ற சுழற்சியை உருவாக்கும் என்று அவர் எச்சரித்தார். அனைவரும் ஒரே நேரத்தில் அதிலிருந்து விலகிச் செல்ல ஒரு வழியைக் கண்டுபிடிக்க வேண்டும் என்றும் இல்லையென்றால் நிலைமை இன்னும் மோசமாகிவிடும் என்றும் அவர் தெரிவித்தார். சமூக ஊடகங்கள் தற்போது சமூகத்தின் மீது ஒரு “புற்றுநோய்” போல செயல்படுவதாகக் காக்ஸ் சாடினார். அத்தகைய வன்முறை காட்சிகளை மக்கள் பார்ப்பது அவர்களுக்கு நல்லதல்ல என்று அவர் கூறினார்.
மேலும், அரசியல் மோதல்களை வார்த்தைகளால் மட்டுமே தீர்க்க வேண்டும், ஆயுதங்களால் அல்ல என்று அவர் வலியுறுத்தினார். இது நம் ஒவ்வொருவருக்கும் ஒரு திருப்புமுனை என்றும், நாம் எதை தேர்வு செய்கிறோம் என்பதை வரலாறு தீர்மானிக்கும் என்றும் அவர் கூறினார்.
