சென்னை: தமிழ் சினிமாவின் தளபதி விஜய், ரசிகர்களால் கொண்டாடப்படும் உச்ச நட்சத்திரம். அவரது திரைப்பயணத்தில் ஒரு திருப்புமுனையாக அமைந்த திரைப்படம் ‘குஷி’. கடந்த 2000-ஆம் ஆண்டு மே மாதம் 19-ஆம் தேதி வெளியான இந்தப் படம், அன்றைய காலகட்டத்தில் மாபெரும் வெற்றி பெற்றது.
இயக்குநர் எஸ்.ஜே.சூர்யா இயக்கத்தில், நடிகர் விஜய் ஜோதிகாவுடன் இணைந்து நடித்த இந்தப் படம், இளமையான காதல் கதைக்களத்தைக் கொண்டு வெளியாகி ரசிகர்களின் மனதைக் கொள்ளையடித்தது. இந்தப் படத்தின் பாடல் காட்சிகளும், வசனங்களும் இன்றும் ரசிகர்களால் சிலாகித்து பேசப்பட்டு வருகின்றன. அன்றைய காலகட்டத்தில் ₹22 கோடிக்கும் அதிகமாக வசூல் செய்து, பாக்ஸ் ஆபிஸிலும் சாதனை படைத்தது.
இப்படியொரு வெற்றிப் படைப்பான ‘குஷி’ திரைப்படம், இப்போது புதிய தொழில்நுட்பத்தில் டிஜிட்டல் முறையில் மெருகூட்டப்பட்டு மீண்டும் திரையரங்குகளில் வெளியாக உள்ளது. ரசிகர்களின் பேராதரவைப் பெற்ற இந்தப் படம் செப்டம்பர் 25-ஆம் தேதி மீண்டும் ரீ-ரிலீஸ் செய்யப்பட உள்ளதாக அதிகாரப்பூர்வமாக அறிவிக்கப்பட்டுள்ளது.
விஜய்யின் இளம் வயது காதல் அத்தியாயத்தை மீண்டும் திரையில் காண ரசிகர்கள் ஆவலுடன் காத்திருக்கின்றனர். இந்த ரீ-ரிலீஸ், விஜய் ரசிகர்களுக்கு ஒரு பெரிய கொண்டாட்டமாக அமையும் என்பதில் சந்தேகமில்லை.
