உலகையே உலுக்கிய உக்ரைன் போருக்குப் பிறகு, ரஷ்யா தனது வலிமையைக் காட்ட மீண்டும் களமிறங்கியுள்ளது. தனது நெருங்கிய கூட்டாளியான பெலாரஸுடன் இணைந்து ‘Zapad 2025’ என்ற மாபெரும் ராணுவப் பயிற்சியை ரஷ்யா தொடங்கியுள்ளது. இதில், அதிநவீன குருஸ் ஏவுகணைகளை ஏவி, அண்டைய நாடுகளையும், நேட்டோ படைகளையும் நடுங்கவைத்துள்ளது.
இந்த ராணுவப் பயிற்சிகள், ஐரோப்பாவில் ஏற்கனவே நிலவிவரும் பதற்றத்தை மேலும் அதிகரித்துள்ளன. போலந்து மற்றும் நேட்டோ நாடுகள் ரஷ்யாவின் வான்வெளியை மீறியதாகக் குற்றம்சாட்டிய நிலையில், இந்த ஏவுகணை சோதனைகள் மேலும் பரபரப்பை ஏற்படுத்தியுள்ளன. ரஷ்யாவின் பாதுகாப்பு அமைச்சகம் வெளியிட்ட தகவலின்படி, அணு ஆயுதங்களைச் சுமந்து செல்லும் திறன்கொண்ட ‘Tu-160’ ரக விமானங்கள், பல மணி நேரம் வான்வெளியில் ரோந்து பணியில் ஈடுபட்டுள்ளன. இந்த விமானங்கள், ‘இஸ்காண்டர்-எம்’ ரக பாலிஸ்டிக் ஏவுகணைகளையும் ஏவி பயிற்சி செய்துள்ளன.
ரஷ்யாவும் பெலாரஸும் இந்த பயிற்சிகள் தற்காப்பு நோக்கங்களுக்காக மட்டுமே நடத்தப்படுவதாகக் கூறினாலும், நேட்டோ நாடுகள் இதனை ஒரு ஆத்திரமூட்டும் செயலாகவே பார்க்கின்றன. உக்ரைன் போருக்கு முன் நடைபெற்ற இதே போன்ற ராணுவப் பயிற்சிகளுக்குப் பிறகுதான் ரஷ்யா உக்ரைன் மீது படையெடுத்தது. இதனால், அண்டை நாடான போலந்து தனது எல்லைகளை தற்காலிகமாக மூடியுள்ளது. அமெரிக்க ராணுவ அதிகாரிகள் இந்த பயிற்சிகளைக் கண்காணித்தபோதும், பதற்றம் குறையவில்லை.
ஏவுகணைகள், விமானங்கள், நீர்மூழ்கிக் கப்பல்கள் என அனைத்தும் பயன்படுத்தப்படும் இந்த போர் ஒத்திகை, ரஷ்யாவின் ராணுவ பலத்தை உலகிற்கு மீண்டும் ஒருமுறை நினைவுபடுத்தியுள்ளது. இது, அடுத்தகட்டமாக எந்தத் திசையில் செல்கிறது என்பதை உலகம் அச்சத்துடன் உற்று நோக்கி வருகிறது.
