ரஷ்யா தனது மேற்குப் பகுதியான குர்ஸ்கை “முழுமையாக விடுவித்ததாக” மாஸ்கோ அறிவித்த ஒரு நாளுக்குப் பின்னர், உக்ரைன் இராணுவம் இன்னும் குர்ஸ்கில் சண்டையிட்டு வருவதாக உக்ரைன் ஜனாதிபதி வோலோடிமிர் ஜெலென்ஸ்கி ஞாயிற்றுக்கிழமை திட்டவட்டமாக தெரிவித்தார். 2022 பிப்ரவரியில் ரஷ்யா தனது தாக்குதலைத் தொடங்கியதில் இருந்து கிழக்கு மற்றும் தெற்கு உக்ரைனின் பகுதிகளைக் கைப்பற்றியுள்ள நிலையில், எதிர்கால அமைதிப் பேச்சுவார்த்தைகளில் குர்ஸ்க் பிராந்தியத்தில் உள்ள நிலத்தை ஒரு பேரம்பேசும் கருவியாக பயன்படுத்த முடியும் என்று கீவ் நம்பியிருந்தது.
“எங்கள் இராணுவம் குர்ஸ்க் மற்றும் பெல்கொரோட் பிராந்தியங்களின் நியமிக்கப்பட்ட பகுதிகளை தீவிரமாக பாதுகாத்து வருகிறது,” என்று ஜெலென்ஸ்கி டெலிகிராமில் தெரிவித்தார். குர்ஸ்க் உட்பட பல பகுதிகளில் நிலைமை கடினமாக இருப்பதாக அவர் மேலும் கூறினார். 2024 ஆகஸ்டில் கீவ் ஒரு அதிர்ச்சி தாக்குதலைத் தொடங்கிய தனது எல்லைப்புற குர்ஸ்க் பிராந்தியத்தில் உக்ரைன் கட்டுப்பாட்டில் இருந்த கடைசி குடியிருப்புப் பகுதியான கோர்னாலை சனிக்கிழமை கைப்பற்றியதாக ரஷ்யா கூறியது. ஆனால் சில மணி நேரங்களுக்குப் பின்னர், உக்ரைன் இராணுவம் தனது படைகள் வெளியேற்றப்பட்டதாகக் கூறப்படுவதை மறுத்து, ரஷ்யாவின் கூற்றை “பிரச்சார தந்திரம்” என்று சாடியது.
“முன் களத்தில் உள்ள நிலைமை மற்றும் ரஷ்ய இராணுவத்தின் உண்மையான நடவடிக்கைகள் இந்த போரை முடிவுக்கு கொண்டு வர ரஷ்யாவுக்கு தற்போதுள்ள அழுத்தம் போதுமானதாக இல்லை என்பதை நிரூபிக்கிறது,” என்று ஜெலென்ஸ்கி கூறினார். “உண்மையான ராஜதந்திரத்திற்கான” அதிக வாய்ப்புகளை உருவாக்க ரஷ்யா மீது அதிக அழுத்தம் கொடுக்க வேண்டும் என்றும் அவர் அழைப்பு விடுத்தார்.
டிரம்ப் சந்திப்பு: வத்திக்கானில் போப் பிரான்சிஸின் இறுதிச் சடங்கின் போது ஜெலென்ஸ்கி அமெரிக்க ஜனாதிபதி டொனால்ட் டிரம்ப் உடன் சாத்தியமான போர் நிறுத்தம் குறித்து விவாதித்த ஒரு நாளுக்குப் பின்னர் அவரது கருத்துக்கள் வந்துள்ளன. செயின்ட் பீட்டர்ஸ் பசிலிக்காவில் நடந்த அவர்களின் சுருக்கமான பேச்சுக்குப் பின்னர், கிழக்கு உக்ரைனின் பெரும் பகுதிகளை அழித்து பல்லாயிரக்கணக்கான மக்களைக் கொன்ற போரை ரஷ்ய ஜனாதிபதி விளாடிமிர் புடின் முடிவுக்குக் கொண்டுவர விரும்புகிறாரா என்பது குறித்து டிரம்ப் சந்தேகம் தெரிவித்தார். அடுத்த இரவு, ரஷ்யா ஆளில்லா விமானம் மற்றும் ஏவுகணை தாக்குதல்களை நடத்தியதில் கிழக்கு உக்ரைனின் பிராந்தியங்களில் நான்கு பேர் கொல்லப்பட்டனர் மற்றும் ஒரு டஜனுக்கும் மேற்பட்டோர் காயமடைந்தனர். ரஷ்ய தலைமை தளபதி வலேரி ஜெராசிமோவ் குறிப்பாக குர்ஸ்க் பிரச்சாரத்தில் போரிட்ட வட கொரிய வீரர்களின் “வீரத்தை” பாராட்டினார். அவர்கள் இந்த மோதலில் பங்கேற்றதை முதன்முறையாக ஒப்புக்கொண்டார். மோதலை உன்னிப்பாகக் கண்காணிக்கும் பல ரஷ்ய இராணுவ வலைப்பதிவர்கள் ரஷ்யா மற்றும் உக்ரைன் எல்லைக்கு அருகிலுள்ள காடுகளில் இன்னும் சண்டை நடந்து கொண்டிருப்பதாக தெரிவித்தனர். ஞாயிற்றுக்கிழமை ஒளிபரப்பப்பட்ட அரசு தொலைக்காட்சி நிகழ்ச்சியின் படி, குர்ஸ்கில் உள்ள உள்ளூர் ரஷ்ய இராணுவ தளபதி ஒருவர் இராணுவம் இன்னும் அப்பகுதியில் நடவடிக்கைகளை மேற்கொண்டு வருவதாக கூறினார்.
“பாதுகாப்பு வலயம்”: ஆகஸ்ட் 2024 இல், இரண்டாம் உலகப் போரின் முக்கிய பீரங்கி சண்டை நடந்த இடமான குர்ஸ்க் மீது உக்ரைன் இராணுவம் ரஷ்ய மண்ணில் முன்னெப்போதும் இல்லாத வகையில் ஒரு எதிர் தாக்குதலை நடத்தியது. இதில் ரஷ்ய எரிவாயு ஐரோப்பாவிற்கு சென்ற ஒரு பம்பிங் நிலையத்தையும் கைப்பற்றியது. ஆனால் மாஸ்கோ பின்னர் கீவ் வீரர்களை தற்காப்பு நிலைக்குத் தள்ளி, படிப்படியாக பிராந்தியத்தின் பெரும்பகுதியை மீட்டெடுத்தது. மார்ச் 2025 இல் உக்ரைனுக்கு அமெரிக்காவின் முக்கிய உளவுத் தகவல் தற்காலிகமாக நிறுத்தப்பட்ட பின்னர், ரஷ்யா தனது முயற்சிகளை இரட்டிப்பாக்கியது. போர் ஆய்வு நிறுவனத்தின் கூற்றுப்படி, நிலத்தடி எரிவாயு குழாய் வழியாக ஒரு ஆச்சரியமான இரகசிய நடவடிக்கை உட்பட பல வழிகளில் முன்னேறியது. குர்ஸ்கை மீட்டெடுத்த பின்னர் 2022 இல் தன்னுடன் இணைத்துக் கொண்டதாகக் கூறப்படும் நான்கு உக்ரைன் பிராந்தியங்களிலும் தொடர்ந்து முன்னேறுவோம் என்று ரஷ்யா கூறியுள்ளது. மேலும் ஜெராசிமோவின் கூற்றுப்படி, ரஷ்யாவுடன் எல்லையைப் பகிர்ந்து கொள்ளும் உக்ரைனின் சுமி பிராந்தியத்தில் ஒரு “பாதுகாப்பு வலையத்தை” உருவாக்க மாஸ்கோ திட்டமிட்டுள்ளது. 2014 இல் ரஷ்யாவுடன் இணைத்துக் கொண்ட கிரிமிய தீபகற்பம் உட்பட உக்ரைனின் சுமார் 20 சதவீத நிலப்பரப்பை ரஷ்யா தற்போது தன்வசம் வைத்துள்ளது.