Warning that THREE tropical diseases are heading to Britain: Scientists discover mosquitoes that spread dengue fever, chikungunya, and Zika in the UK for the first time.
இங்கிலாந்தில் உஷ்ண மண்டல நோய்கள் படையெடுப்பு: பீதியில் மக்கள்! டெங்கு, சிக்குன்குனியா, ஸிகா பரப்பும் கொசுக்கள் முதன்முறையாகக் கண்டுபிடிப்பு!
லண்டன்: காலநிலை மாற்றத்தால் ஐரோப்பா முழுவதும் சுகாதார அவசரநிலை அச்சுறுத்தல் எழுந்துள்ளது. இதுவரை வெப்பமண்டல நாடுகளில் மட்டுமே காணப்பட்ட கொடிய டெங்கு, சிக்குன்குனியா (Chikungunya) மற்றும் ஸிகா (Zika) போன்ற நோய்களைப் பரப்பும் கொசு இனங்கள், முதன்முறையாக இங்கிலாந்தின் எல்லைக்குள் கண்டறியப்பட்டுள்ளதாக விஞ்ஞானிகள் எச்சரிக்கை விடுத்துள்ளனர்.
பிரிட்டனின் சுகாதாரப் பாதுகாப்பு நிறுவனம் (UK Health Security Agency – UKHSA) நடத்திய கண்காணிப்பு ஆய்வில், ஏடிஸ் ஏஜிப்டி (Aedes aegypti) எனும் எகிப்திய கொசு மற்றும் ஏடிஸ் அல்போபிக்டஸ் (Aedes albopictus) எனப்படும் ஆசியப் புலி கொசு (Asian Tiger Mosquito) ஆகிய இரு இனங்கள் கண்டறியப்பட்டுள்ளன.
எங்கே, எப்படி நுழைந்தன?
- புலி கொசு: 2024 ஆம் ஆண்டு ஆகஸ்ட் மாதத்தில் கென்ட்டில் உள்ள ஒரு மோட்டார்வே சேவை மையத்தில் ஆசியப் புலி கொசுக்கள் கண்டெடுக்கப்பட்டன.
- எகிப்திய கொசு: 2023 செப்டம்பரில் லண்டன் ஹீத்ரோ விமான நிலையத்திற்கு அருகிலுள்ள சரக்கு சேமிப்புக் கிடங்கில் எகிப்திய கொசுக்களின் முட்டைகள் கண்டறியப்பட்டன.
விஞ்ஞானிகளின் அதிர்ச்சி எச்சரிக்கை!
இந்த இரு கொசு இனங்களும் மஞ்சள் காய்ச்சல், டெங்கு, சிக்குன்குனியா மற்றும் ஸிகா போன்ற பல ஆபத்தான நோய்களைப் பரப்பும் வல்லமை கொண்டவை. காலநிலை வெப்பமயமாகி வருவதால், ஐரோப்பாவின் தெற்கு மற்றும் மத்திய பகுதிகளில் ஏற்கெனவே இக்கொசுக்கள் பரவி, அவ்வப்போது டெங்கு போன்ற நோய்கள் உருவாகக் காரணமாகின்றன.
“சரியான நேரத்தில் நடவடிக்கை எடுக்கப்படாவிட்டால், படையெடுக்கும் இந்தக் கொசு இனங்கள் இங்கிலாந்தில் நிரந்தரமாகத் தங்குவதற்கான அபாயம் உள்ளது. இது, டெங்கு மற்றும் ஸிகா போன்ற அர்போவைரஸ் நோய்கள் உள்ளூரிலேயே பரவுவதற்கான அபாயத்தை அதிகரிக்கும்,” என UKHSA விஞ்ஞானிகள் எச்சரித்துள்ளனர்.
பூஜ்ஜிய வெப்பநிலை காணப்பட்ட இங்கிலாந்தின் காலநிலை, இப்போது கோடை காலங்களில் அதிக வெப்பத்துடனும், குளிர்காலம் லேசாகவும் மாறுவதால், இந்தக் கொசுக்கள் இங்கு நிலைபெற சாதகமான சூழல் உருவாகிறது. எனவே, துறைமுகங்கள், சரக்குப் போக்குவரத்து மையங்கள் மற்றும் தென் கிழக்கு இங்கிலாந்துப் பகுதிகளில் தீவிர கண்காணிப்பு மேற்கொள்ளப்பட்டு வருகிறது. இந்தப் புதிய அச்சுறுத்தல், பிரிட்டிஷ் பொதுமக்களிடையே பெரும் சுகாதார பீதியை ஏற்படுத்தியுள்ளது.
