யாழ்ப்பாணம் செம்மணி மனிதப் புதைகுழிக்கு சர்வதேச நீதி கோரி, எதிர்வரும் நாளை (ஜூன் 23) முதல் 25ஆம் திகதி வரை ‘அணையா விளக்கு போராட்டம்’ ஒன்று முன்னெடுக்கப்படவுள்ளது. “மக்கள் செயல்” என்ற தன்னார்வ இளையோர் அமைப்பினால் செம்மணி வளைவுப் பகுதியில் ஏற்பாடு செய்யப்பட்டுள்ள இந்தப் போராட்டத்திற்கு அனைத்து தமிழ்த்தேசிய உணர்வாளர்களும் அணிதிரளுமாறு நாடாளுமன்ற உறுப்பினர் எஸ். ஸ்ரீதரன் அழைப்பு விடுத்துள்ளார். செம்மணி மனிதப் புதைகுழியில் புதைக்கப்பட்டவர்களுக்கு சர்வதேச நீதி கோருவதும், சர்வதேச கண்காணிப்புடனான மனிதப் புதைகுழி அகழ்வை வலியுறுத்துவதும் இந்தப் போராட்டத்தின் முக்கிய நோக்கங்களாகும். தமிழர்களின் பண்பாட்டில் நம்பிக்கை சார்ந்த மரபாக இருக்கும் அணையா விளக்கினை முன்னிலைப்படுத்தியே இந்தப் போராட்டம் ஏற்பாட்டாளர்களால் வடிவமைக்கப்பட்டுள்ளது.
போராட்டம் இடம்பெறும் மூன்று தினங்களில் முதல் இரண்டு நாட்களிலும் (ஜூன் 23, 24) சுழற்சி முறையிலான அடையாள உண்ணாவிரதம் இடம்பெறவுள்ளது. அத்துடன், செம்மணி மனிதப் புதைகுழி தொடர்பான செய்திப் படக் கண்காட்சியும், மக்கள் கையெழுத்து திரட்டலும் நடைபெறவுள்ளன. மேலும், செம்மணி மனிதப் புதைகுழியோடு தொடர்புபட்ட கதை, கவிதைப் படைப்புகள் மற்றும் நாடக அளிக்கை போன்ற நிகழ்வுகளும் ஏற்பாடு செய்யப்பட்டுள்ளன. இவை, செம்மணி சம்பவத்தின் வலிமையையும், பாதிக்கப்பட்டவர்களுக்கு நீதி தேடும் உணர்வையும் வெளிப்படுத்தும் வகையில் அமையும் என எதிர்பார்க்கப்படுகிறது.
போராட்டத்தின் மூன்றாம் நாளான ஜூன் 25ஆம் திகதி, மாபெரும் கவனயீர்ப்புப் போராட்டம் முன்னெடுக்கத் திட்டமிடப்பட்டுள்ளது. இதே நாளில், ஐக்கிய நாடுகள் மனித உரிமைகள் பேரவையின் ஆணையாளர் வோல்கர் டர்க் யாழ்ப்பாணத்திற்குப் பயணம் மேற்கொள்ளவுள்ளார். அவரது கவனத்தை ஈர்க்கும் வகையில் இந்தப் போராட்டம் அமையும் என எதிர்பார்க்கப்படுகிறது. செம்மணி மனிதப் புதைகுழி விவகாரத்திற்கு சர்வதேச அளவில் நீதி கிடைக்க வேண்டும் என்ற தமிழர்களின் நீண்டகால கோரிக்கைக்கு, இந்த ‘அணையா விளக்கு போராட்டம்’ மேலும் வலு சேர்க்கும் என நம்பப்படுகிறது.
