ஈரானின் அணு ஆயுதத் திட்டம் மற்றும் ஏவுகணைத் திட்டங்களைக் கட்டுப்படுத்தும் நோக்கில், அமெரிக்க அதிபர் டொனால்ட் ட்ரம்ப் ‘யுஎஸ்எஸ் ஜெரால்ட் ஆர். ஃபோர்டு’ (USS Gerald R. Ford) என்ற உலகின் மிகப்பெரிய விமானம் தாங்கிப் போர்க்கப்பலை மத்திய கிழக்கு பகுதிக்கு அனுப்ப உத்தரவிட்டுள்ளார். ஈரானுடன் பேச்சுவார்த்தைகள் நடந்து வரும் வேளையில், இந்த ராணுவ நடவடிக்கை அந்நாட்டிற்கு ஒரு நேரடி எச்சரிக்கையாகப் பார்க்கப்படுகிறது.
தற்போது மத்திய கிழக்கு பகுதியில் நிலைநிறுத்தப்பட்டுள்ள ‘யுஎஸ்எஸ் ஆபிரகாம் லிங்கன்’ (USS Abraham Lincoln) போர்க்கப்பலுடன், இப்போது அனுப்பப்பட்டுள்ள ‘ஜெரால்ட் ஆர். ஃபோர்டு’ கப்பலும் இணைய உள்ளது. கரீபியன் கடலில் இருந்து கிளம்பியுள்ள இந்தக் கப்பல் மற்றும் அதன் துணைப் போர்க்கப்பல்கள் அந்தப் பகுதியை அடைய சுமார் மூன்று வாரங்கள் ஆகும். இதன் மூலம் அந்தப் பிராந்தியத்தில் அமெரிக்காவின் ராணுவத் தாக்குதல் திறன் (Firepower) பல மடங்கு அதிகரிக்க உள்ளது.
அமெரிக்காவில் இஸ்ரேல் பிரதமர் பெஞ்சமின் நெதன்யாகுவை ட்ரம்ப் சந்தித்த ஒரு நாளுக்குப் பிறகு இந்த அதிரடி முடிவு எடுக்கப்பட்டுள்ளது. ஈரானின் அணுச் சுத்திகரிப்பு மற்றும் ஹெஸ்புல்லா போன்ற அமைப்புகளுக்கு ஈரான் அளிக்கும் ஆதரவைத் தடுப்பது குறித்து இருவரும் ஆலோசித்தனர். இது குறித்துப் பேசிய ட்ரம்ப், “ஈரானுடன் ஒரு ஒப்பந்தம் ஏற்படவில்லை என்றால், அது அவர்களுக்கு மிகவும் மோசமான மற்றும் அதிர்ச்சிகரமான நாளாக (Very Traumatic) அமையும்” என்று எச்சரித்துள்ளார்.
பொருளாதாரத் தடைகளை நீக்கினால் அணுச் சுத்திகரிப்பைக் குறைக்கத் தயார் என்று ஈரான் தெரிவித்துள்ள போதிலும், ஏவுகணைத் திட்டங்களை நிறுத்த முடியாது என்று பிடிவாதமாக உள்ளது. ஒருவேளை அமெரிக்கா தாக்குதல் நடத்தினால், அமெரிக்க ராணுவத் தளங்கள் மீது பதில் தாக்குதல் நடத்துவோம் என்று ஈரானின் புரட்சிகர பாதுகாப்புப் படை (Revolutionary Guards) மிரட்டல் விடுத்துள்ளது. அமெரிக்கா தற்போது ஈரானுக்கு எதிராகப் பல வாரங்கள் நீடிக்கக்கூடிய ஒரு மிகப்பெரிய ராணுவ நடவடிக்கைக்குத் (Sustained operations) தயாராகி வருவதாகத் தகவல்கள் தெரிவிக்கின்றன.
