கியூபா நாடு அதன் வரலாற்றிலேயே கண்டிராத ஒரு மாபெரும் மனிதாபிமான நெருக்கடியைச் சந்தித்து வருகிறது. அமெரிக்க அதிபர் டொனால்ட் டிரம்ப், கியூபாவிற்கு எண்ணெய் வழங்கும் நாடுகள் மீது கூடுதல் வரி விதிக்கப்படும் என அறிவித்ததைத் தொடர்ந்து, அந்நாட்டிற்கான எரிபொருள் வரத்து முற்றிலும் நின்றுபோனது. இதனால் கியூபாவின் மின்சாரக் கட்டமைப்பு சீர்குலைந்து, நாட்டின் பெரும்பாலான பகுதிகள் பல வாரங்களாக இருளில் மூழ்கியுள்ளன. பெட்ரோல் நிலையங்களில் பல கிலோமீட்டர் தூரத்திற்கு வாகனங்கள் அணிவகுத்து நிற்கின்றன, ஆனால் ஒரு சொட்டு எரிபொருள் கூடக் கிடைக்காத நிலை நீடிக்கிறது.
இந்த எரிபொருள் தட்டுப்பாடு கியூபாவின் பொருளாதாரத் தூணான சுற்றுலாத் துறையை அடியோடு சாய்த்துவிட்டது. விமானங்களுக்குத் தேவையான ‘ஜெட் எரிபொருள்’ (Jet Fuel) இல்லாததால், ஏர் கனடா உள்ளிட்ட முன்னணி விமான நிறுவனங்கள் கியூபாவிற்கான சேவையை ரத்து செய்துள்ளன. தங்கியிருந்த ஆயிரக்கணக்கான சுற்றுலாப் பயணிகள் ‘மீட்பு விமானங்கள்’ (Rescue Flights) மூலம் அவசர அவசரமாகத் தாயகம் திருப்பி அனுப்பப்பட்டு வருகின்றனர். சுமார் 30-க்கும் மேற்பட்ட சொகுசு ஹோட்டல்கள் மற்றும் ரிசார்ட்டுகள் மின்சாரம் மற்றும் உணவின்றி மூடப்பட்டுள்ளன. இதனால் சுற்றுலாத் துறையை நம்பியிருந்த 3 லட்சம் கியூபத் தொழிலாளர்களின் வாழ்வாதாரம் கேள்விக்குறியாகியுள்ளது.
உணவுப் பற்றாக்குறை மற்றொரு பேரிடராக மாறியுள்ளது. விவசாய நிலங்களில் விளையும் பொருட்களை நகரங்களுக்குக் கொண்டு செல்ல லாரிகள் இல்லாததால், சந்தைகளில் காய்கறி மற்றும் அத்தியாவசியப் பொருட்களின் விலை விண்ணைத் தொட்டுள்ளது. “எங்களிடம் சமைக்க எரிவாயு இல்லை, சாப்பிட உணவு இல்லை, குடிக்கக் கூட சுத்தமான தண்ணீர் இல்லை” என்று ஹவானா நகர மக்கள் கண்ணீர் மல்கத் தெரிவிக்கின்றனர். குப்பைகளை அள்ளும் வாகனங்களுக்குக் கூட டீசல் இல்லாததால், தெருக்களில் குப்பைகள் மலைபோல் குவிந்து சுகாதாரச் சீர்கேட்டை ஏற்படுத்தி வருகின்றன. ஐக்கிய நாடுகள் சபை இதனை ஒரு ‘மனிதாபிமானச் சரிவு’ (Humanitarian Collapse) என்று எச்சரித்துள்ளது.
நிலைமை மோசமடைந்ததைத் தொடர்ந்து, கியூப அரசு பல்கலைக்கழகங்கள் மற்றும் பள்ளிகளுக்கு காலவரையற்ற விடுமுறை அறிவித்துள்ளது. அரசு ஊழியர்களுக்கு வாரத்திற்கு 4 நாட்கள் மட்டுமே வேலை என அறிவிக்கப்பட்டுள்ளது. மெக்சிகோ போன்ற நாடுகள் மனிதாபிமான அடிப்படையில் 800 டன் உணவுப் பொருட்களை அனுப்பியிருந்தாலும், அது 1.1 கோடி மக்கள் தொகை கொண்ட கியூபாவிற்குப் போதுமானதாக இல்லை. அமெரிக்காவின் இந்த ‘அதிகபட்ச அழுத்தம்’ கியூபாவை ஒரு மிகப்பெரிய உள்நாட்டுப் போருக்கோ அல்லது ஒட்டுமொத்த பட்டினிச் சாவிற்கோ தள்ளக்கூடும் என சர்வதேச அரசியல் வல்லுநர்கள் அச்சம் தெரிவித்துள்ளனர்.
