பிரம்மாண்ட இயக்குனர் ஷங்கர் தனது சமூக வலைதளப் பக்கத்தில் ‘சிறை’ திரைப்படத்தைப் பாராட்டிப் பதிவிட்டுள்ளார். அதில், “சிறை – மிகச் சிறந்த திரைப்படம். பல இடங்களில் என்னைத் தானாகவே அழவைத்துவிட்டது. படத்தில் உள்ள அனைத்து கதாபாத்திரங்களும், அவர்களின் நடிப்பும் படம் முடிந்த பிறகும் என் மனதிலேயே நிற்கின்றன” என்று பதிவிட்டுள்ளார். மேலும், நடிகர் விக்ரம் பிரபுவின் நேர்த்தியான நடிப்பையும், அறிமுக நடிகர்கள் அக்ஷய் குமார் மற்றும் அனிஷ்மா ஆகியோரின் எதார்த்தமான பங்களிப்பையும் அவர் வெகுவாகப் பாராட்டியுள்ளார்.
இப்படத்தைத் தயாரித்த எஸ்.எஸ். லலித் குமார் மற்றும் அறிமுக இயக்குனர் சுரேஷ் ராஜகுமாரி ஆகியோருக்குத் தனது மனமார்ந்த வாழ்த்துகளை ஷங்கர் தெரிவித்துள்ளார். “இயக்குனர் சுரேஷ் தனது முதல் படத்திலேயே ரசிகர்களின் இதயத்தைச் சிறைபிடித்துள்ளார்; குறிப்பாகப் படத்தின் கடைசி காட்சியில் சொல்லப்பட்டுள்ள செய்தி மிகவும் வலிமையானது மற்றும் தற்போதைய காலத்திற்கு அவசியமானது” என்று அவர் குறிப்பிட்டுள்ளார். 2025-ஆம் ஆண்டின் இறுதியில் தமிழ் சினிமாவிற்கு ஒரு மிகச்சிறந்த படம் கிடைத்துள்ளதாகவும் அவர் பெருமிதம் தெரிவித்துள்ளார்.
இயக்குனர் தமிழின் (டாணாக்காரன் புகழ்) கதை மற்றும் வசனத்தில் உருவாகியுள்ள ‘சிறை’, ஒரு காவல்துறை அதிகாரி மற்றும் ஒரு கைதிக்கு இடையே நடக்கும் உணர்ச்சிகரமான பயணத்தைப் பேசுகிறது. விக்ரம் பிரபுவின் திரைப்பயணத்தில் இது ஒரு மிக முக்கியமான படமாகப் பார்க்கப்படுகிறது. ஷங்கர் மட்டுமன்றி, இயக்குனர் மாரி செல்வராஜ் போன்ற பல முன்னணி திரைத்துறையினரும் இந்தப் படத்தைப் பாராட்டி வருகின்றனர்.
படத்தில் சிறுபான்மையினர் எதிர்கொள்ளும் பிரச்சினைகள் மற்றும் நீதித்துறை சார்ந்த சிக்கல்கள் மிகவும் ஆழமாகப் பேசப்பட்டுள்ளன. ரசிகர்களிடையே நல்ல வரவேற்பைப் பெற்று வரும் இப்படம், ஷங்கரின் இந்தப் பாராட்டுக்குப் பிறகு சமூக வலைதளங்களில் வைரலாகி வருகிறது. குறிப்பாக, உணர்ச்சிகரமான கதைகளை ரசிக்கும் ஆடியன்ஸுக்கு இந்தப் படம் ஒரு சிறந்த விருந்தாக அமைந்துள்ளது.
