எப்ஸ்டீன் 2014 மற்றும் 2015-ம் ஆண்டுகளில் அனுப்பிய மின்னஞ்சல்களில், ‘ஏஞ்சல்ஸ் ட்ரம்பெட்’ அல்லது ‘சோம்பி செடி’ எனப்படும் செடிகளைத் தனது பண்ணையில் வளர்ப்பது குறித்துத் தீவிர ஆர்வம் காட்டியுள்ளார். இந்தச் செடிகளில் இருந்து பிரித்தெடுக்கப்படும் ஸ்கோபோலமைன் (Scopolamine) என்ற வேதிப்பொருள், ஒரு மனிதனின் சுயநினைவை (Free Will) முற்றிலுமாக மழுங்கடிக்கச் செய்யும் திறன் கொண்டது. பாதிக்கப்பட்டவர்களுக்குத் தெரியாமல் இதனை உணவு அல்லது பானங்களில் கலந்துகொடுக்கும்போது, அவர்கள் ஒரு ‘சோம்பி’ (Zombie) போலச் செயல்படுவார்கள் என்றும், அவர்கள் உடலில் நடக்கும் எதையும் எதிர்க்கும் திறனை இழந்துவிடுவார்கள் என்றும் மருத்துவ ஆய்வுகள் தெரிவிக்கின்றன.
எப்ஸ்டீன் தனது மின்னஞ்சல்களில் “நர்சரியில் உள்ள எனது ட்ரம்பெட் செடிகள் எப்படி இருக்கின்றன?” என்று ஒரு உதவியாளரிடம் கேட்டுள்ளார். மேலும், இந்தச் செடியின் வீரியம் மற்றும் அதன் மூலம் ஒருவரை எப்படிக் கட்டுப்பாட்டிற்குள் கொண்டு வருவது என்பது குறித்த விவரங்களையும் அவர் சேகரித்து வைத்திருந்தார். இந்த ‘ஸ்கோபோலமைன்’ மருந்து கொடுக்கப்பட்ட ஒரு நபர், அப்போது நடக்கும் எந்த நிகழ்வையும் பின்னர் நினைவுகூர முடியாது (Memory Loss). எப்ஸ்டீனின் பண்ணை வீட்டில் பாதிக்கப்பட்ட பல பெண்கள், தங்களுக்கு என்ன நடந்தது என்றே தெரியாமல் மயக்க நிலையில் இருந்ததாகக் கூறியிருந்த வாக்குமூலங்கள், தற்போது இந்தச் செடியுடன் ஒத்துப்போகின்றன.
உலக அளவில் ‘ஏஞ்சல்ஸ் ட்ரம்பெட்’ செடிகள் அழகுக்காக வளர்க்கப்பட்டாலும், அதன் ஆபத்து கருதிப் பல நாடுகளில் இவை தடை செய்யப்பட்டுள்ளன. கொலம்பியா போன்ற நாடுகளில் குற்றவாளிகள் தங்களுக்குத் தேவையான தகவல்களைப் பெறவும், பாலியல் வன்கொடுமைகளுக்கும் இந்த ‘பேயின் சுவாசத்தை’ பயன்படுத்துகின்றனர். இந்தியாவில் இந்தத் தாவரம் ஊமத்தை (Datura) செடியின் ஒரு வகையாகக் கருதப்பட்டாலும், அதன் வேதியியல் பண்புகள் மிகவும் ஆபத்தானவை என மருத்துவ வல்லுநர்கள் எச்சரிக்கின்றனர். எப்ஸ்டீன் போன்ற ஒரு நபர் திட்டமிட்டு இத்தகைய செடிகளை வளர்த்தது, அவரது குற்றங்களின் ஆழத்தை வெளிச்சமிட்டுக் காட்டுகிறது.
தற்போது அமெரிக்க நீதித்துறை (DOJ) வெளியிட்டுள்ள இந்த மின்னஞ்சல்கள், எப்ஸ்டீன் வெறும் பாலியல் குற்றவாளி மட்டுமல்ல, அவர் ஒரு திட்டமிட்ட ‘விஞ்ஞான ரீதியான குற்றவாளி’ (Scientific Predator) என்பதையும் நிரூபித்துள்ளன. இந்தச் செடியிலிருந்து எடுக்கப்பட்ட மருந்துகள் எப்ஸ்டீனின் சொகுசுத் தீவான லிட்டில் செயின்ட் ஜேம்ஸிற்கு அனுப்பப்பட்டதா என்பது குறித்து எஃப்.பி.ஐ (FBI) தற்போது புதிய விசாரணையைத் தொடங்கியுள்ளது. இந்த மர்மமான ‘சோம்பி செடி’ விவகாரம், எப்ஸ்டீன் வழக்கில் பாதிக்கப்பட்டவர்களுக்கு இன்னும் நீதியைப் பெற்றுத் தருவதில் முக்கியப் பங்கு வகிக்கும் என்று எதிர்பார்க்கப்படுகிறது.
