இயக்குநர் ஏ.ஆர். முருகதாஸ், சமீபத்தில் அளித்த பேட்டியில், நடிகர் விஜய்யுடன் இணைந்து ‘பீஸ்ட்’ படத்திற்கு முன்பு தொடங்கவிருந்த படம் கைவிடப்பட்டது குறித்து மனம் திறந்து பேசியுள்ளார். அந்தக் கதை விஜய்க்கு மிகவும் பிடித்திருந்தது என்றும், ஆனால் அப்போது இருந்த சந்தை நிலவரம் மற்றும் கோவிட்-19 தாக்கத்தால் ஏற்பட்ட நிச்சயமற்ற சூழல் காரணமாகவே அத்திட்டம் கைவிடப்பட்டது என்றும் அவர் தெரிவித்தார்.
தங்களுக்கும் விஜய்க்கும் இடையே எந்தவித கருத்து வேறுபாடும் இல்லை என்றும், இருவரும் இப்போதும் நல்ல நண்பர்களாகவே இருக்கிறோம் என்றும் முருகதாஸ் உறுதிப்படுத்தினார். ஒருவேளை அப்போது எல்லாம் சரியாக அமைந்திருந்தால், ‘துப்பாக்கி’, ‘கத்தி’, ‘சர்கார்’ ஆகிய படங்களுக்குப் பிறகு இது நான்காவது படமாக அமைந்திருக்கும் என்று அவர் குறிப்பிட்டார்.
விஜய் அரசியலில் நுழைந்துள்ளதால், ‘துப்பாக்கி 2’ படம் உருவாவது சாத்தியமில்லை என்றும் முருகதாஸ் கூறினார். “அந்தப் படத்தை விஜய்யால் மட்டுமே செய்ய முடியும்” என்றும் அவர் குறிப்பிட்டார்.
முருகதாஸ் இயக்கத்தில் சிவகார்த்திகேயன் நடித்துள்ள ‘மதராஸி’ திரைப்படம் செப்டம்பர் 5-ம் தேதி திரையரங்குகளில் வெளியாக உள்ளது. இந்தப் படம் தமிழ், தெலுங்கு, கன்னடம், மலையாளம் மற்றும் இந்தி ஆகிய மொழிகளில் வெளியிடப்பட உள்ளது. இந்தியில் இந்தப் படத்திற்கு ‘Dil Madharaasi’ என்று பெயரிடப்பட்டுள்ளது. இந்தப் படத்தில் ருக்மணி வசந்த், பிஜு மேனன், விக்ராந்த் மற்றும் ஷபீர் கல்லாரக்கல் ஆகியோர் முக்கிய கதாபாத்திரங்களில் நடித்துள்ளனர்.
