ஆஸ்திரேலியாவின் அதிரடி பேட்ஸ்மேன் டேவிட் வார்னர், கடந்த ஞாயிற்றுக்கிழமை (ஏப்ரல் 5, 2026) மாலை சிட்னியின் மாரூப்ரா (Maroubra) பகுதியில் உள்ள மலாபர் சாலையில் தனது வானில் (Van) சென்று கொண்டிருந்தார். அப்போது அங்கு நியூ சவுத் வேல்ஸ் போலீசார் வாகன சோதனையில் ஈடுபட்டிருந்தனர். போலீசாரின் சோதனையைக் கண்டதும், வார்னர் தனது வாகனத்தை சோதனை மையத்திற்குச் சற்று முன்பே நிறுத்தி ஓரமாக நிறுத்த முயன்றுள்ளார். இதனால் சந்தேகமடைந்த போக்குவரத்துப் பிரிவு போலீசார், அவரது வாகனத்தை அணுகி வார்னருக்கு சுவாசப் பரிசோதனை (Breath Test) நடத்தினர்.
இந்த சோதனையில் வார்னர் மது அருந்தியிருந்தது உறுதியானது. இதனைத் தொடர்ந்து அவர் கைது செய்யப்பட்டு மாரூப்ரா போலீஸ் நிலையத்திற்கு அழைத்துச் செல்லப்பட்டார். அங்கு நடத்தப்பட்ட இரண்டாவது சோதனையில், அவரது இரத்தத்தில் ஆல்கஹால் அளவு 0.104 ஆக இருந்தது கண்டறியப்பட்டது. இது ஆஸ்திரேலியாவில் அனுமதிக்கப்பட்ட அளவை விட இரண்டு மடங்கு அதிகமாகும். இதற்காக அவர் மீது ‘மத்திய நிலை மதுப் பழக்கம்’ (Mid-range prescribed concentration of alcohol) பிரிவின் கீழ் வழக்குப் பதிவு செய்யப்பட்டுள்ளது. பின்னர் அவர் பிணையில் விடுவிக்கப்பட்டாலும், வரும் மே 7-ம் தேதி சிட்னி நீதிமன்றத்தில் ஆஜராக வேண்டும் என சம்மன் வழங்கப்பட்டுள்ளது.
வார்னர் தற்போது பாகிஸ்தான் சூப்பர் லீக் (PSL) தொடரில் கராச்சி கிங்ஸ் அணியின் கேப்டனாக விளையாடி வருகிறார். கடந்த ஏப்ரல் 2-ம் தேதி நடந்த போட்டிக்குப் பிறகு, அடுத்த போட்டிக்கு சில நாட்கள் இடைவெளி இருந்ததால் அவர் தனது குடும்பத்துடன் நேரத்தைச் செலவிட சிட்னி திரும்பியிருந்தார். இந்த ஓய்வு நேரத்தில் தான் அவர் இத்தகைய சர்ச்சையில் சிக்கியுள்ளார். அவர் மீண்டும் பாகிஸ்தான் சென்று தனது அணியுடன் இணைவாரா அல்லது இந்த சட்ட சிக்கல்கள் அவரது விளையாட்டைப் பாதிக்குமா என்ற கேள்வி எழுந்துள்ளது. இருப்பினும், அவர் திட்டமிட்டபடி ஏப்ரல் 9-ம் தேதி நடக்கவுள்ள அடுத்த போட்டியில் பங்கேற்பார் என எதிர்பார்க்கப்படுகிறது.
சர்வதேச கிரிக்கெட்டில் இருந்து 2024-ல் ஓய்வு பெற்ற வார்னர், தொடர்ந்து பல்வேறு டி20 லீக் தொடர்களில் விளையாடி வருகிறார். சமீபத்தில் நடந்த பிக் பாஷ் லீக் (BBL) தொடரில் சிட்னி தண்டர் அணிக்காக அபாரமாக விளையாடி 86.6 சராசரியுடன் 433 ரன்களைக் குவித்தார். ஏற்கனவே ‘சாண்ட்பேப்பர்’ பந்து சேதப்படுத்துதல் புகார் மற்றும் ஜோ ரூட்டைத் தாக்கிய சர்ச்சை எனப் பல சிக்கல்களைச் சந்தித்த வார்னருக்கு, இந்த மது போதை ஓட்டுநர் வழக்கு அவரது நற்பெயருக்கு மற்றுமொரு சவாலாக அமைந்துள்ளது. இந்தச் சம்பவம் குறித்து அவரது பிபிஎல் அணியான சிட்னி தண்டர் இதுவரை கருத்து தெரிவிக்கவில்லை.
