ஈரான் மற்றும் அமெரிக்கா-இஸ்ரேல் படைகளுக்கு இடையே நடைபெற்று வரும் போர் தீவிரமடைந்துள்ள நிலையில், ஈரானின் மிக முக்கியமான கச்சா எண்ணெய் ஏற்றுமதி மையமான ‘கர்க் தீவை’ (Kharg Island) அமெரிக்கா மற்றும் இஸ்ரேல் படைகள் கைப்பற்றினால், அது உலகளாவிய கச்சா எண்ணெய் சந்தையில் பெரும் அதிர்ச்சியை ஏற்படுத்தும் என்று ஜே.பி. மோர்கன் (JP Morgan) எச்சரித்துள்ளது. ஈரானின் 90 சதவீத கச்சா எண்ணெய் ஏற்றுமதியைக் கையாளும் இந்தத் தீவைக் கைப்பற்றினால், ஈரானின் எண்ணெய் ஏற்றுமதி முழுவதுமாக முடக்கப்படுவதுடன், அந்நாட்டின் ஒட்டுமொத்த உற்பத்தி பாதியாகக் குறையும் என்று அந்நிறுவனம் தனது ஆய்வறிக்கையில் தெரிவித்துள்ளது.
கர்க் தீவைக் கைப்பற்றுவது ஈரானின் பொருளாதாரத்திற்குப் பெரும் அடியைக் கொடுக்கும் என்றாலும், அதற்குப் பதிலாக ஈரான் தனது வசம் உள்ள வான் மற்றும் கடல்வழிப் படைகளைப் பயன்படுத்தி, ஹோர்முஸ் ஜலசந்தி (Strait of Hormuz) மற்றும் பிராந்திய எரிசக்தி உள்கட்டமைப்புகள் மீது கடுமையான தாக்குதல்களை நடத்தும் வாய்ப்புகள் அதிகம் என்று ஜே.பி. மோர்கன் சுட்டிக்காட்டுகிறது. ஏற்கனவே இப்பகுதியில் நடைபெற்று வரும் மோதல்களால், சர்வதேச சந்தையில் கச்சா எண்ணெய் விலை ஒரு பேரல் 119 டாலர் வரை உயர்ந்துள்ள நிலையில், இந்த நடவடிக்கை விலையை மேலும் அதிகரிக்கச் செய்யும் என்று அஞ்சப்படுகிறது.
ஈரானின் எண்ணெய் உற்பத்தி மற்றும் ஏற்றுமதி கட்டமைப்பை முடக்குவது எளிதான காரியம் அல்ல என்றும், அதற்குத் தொடர்ச்சியான மற்றும் பெரிய அளவிலான இராணுவத் தாக்குதல்கள் தேவைப்படும் என்றும் அந்த அறிக்கையில் குறிப்பிடப்பட்டுள்ளது. கடந்த காலங்களில் ஈராக்-ஈரான் போரின்போது, ஈராக் படைகள் இந்தத் தீவின் மீதும் கப்பல்கள் மீதும் தாக்குதல் நடத்திய போதிலும், ஈரான் அதை விரைவாகச் சீரமைத்து ஏற்றுமதியைத் தொடர்ந்தது. எனவே, கர்க் தீவின் உள்கட்டமைப்பை முழுமையாகச் செயலிழக்கச் செய்வது என்பது நீண்டகால இராணுவ நடவடிக்கைகளை அவசியமாக்கும் என்று ஆய்வாளர்கள் கருதுகின்றனர்.
தற்போதைய போர்க்களச் சூழலில், மத்திய கிழக்கு நாடுகள் பலவும் எண்ணெய் உற்பத்தியைக் குறைத்துள்ளதால், உலகளாவிய விநியோகச் சங்கிலியில் பெரும் பதற்றம் நிலவுகிறது. ஜி-7 நாடுகள் அவசரகால எண்ணெய் இருப்புகளைச் சந்தையில் வெளியிட ஆலோசனை நடத்தி வரும் போதிலும், கர்க் தீவு விவகாரம் போர்ச் சூழலை மேலும் சிக்கலாக்கியுள்ளது. ஈரானின் எண்ணெய் வருவாயை முடக்கும் அமெரிக்காவின் இந்தத் திட்டம் நிறைவேற்றப்பட்டால், அது உலகப் பொருளாதாரம் மற்றும் பணவீக்கத்தில் கடுமையான தாக்கத்தை ஏற்படுத்தும் என்று வல்லுநர்கள் எச்சரித்துள்ளனர்.
