பழிதீர்க்கும் ஈரான் கூகுள், ஆப்பிள் மீது தாக்குதல் – ஊழியர்களை வெளியேறச் சொன்ன ஈரான் !

அமெரிக்கா மற்றும் இஸ்ரேல் இணைந்து நடத்திய வான்வழித் தாக்குதலில் ஈரானின் உயர்மட்டத் தலைவர்கள் கொல்லப்பட்டதற்குப் பழிவாங்க, வளைகுடா நாடுகளில் உள்ள அமெரிக்கத் தொழில்நுட்ப மற்றும் தொழில் நிறுவனங்களைத் தாக்கப்போவதாக ஈரான் அறிவித்துள்ளது. ஈரானின் புரட்சிகர காவல்படை (IRGC) வெளியிட்டுள்ள அறிக்கையில், ஏப்ரல் 1-ஆம் தேதி (இன்று) ஈரான் நேரப்படி இரவு 8 மணி முதல் இந்தத் தாக்குதல்கள் தொடங்கும் என்று குறிப்பிடப்பட்டுள்ளது. ஈரானில் நடத்தப்படும் ஒவ்வொரு “பயங்கரவாதச் செயலுக்கும்” பதிலாக, அந்தந்த நிறுவனங்களின் கிளைகள் அழிக்கப்படும் என்று ஈரான் எச்சரித்துள்ளது.

ஈரான் குறிவைத்துள்ள இந்தப் பட்டியலில் சுமார் 18 முன்னணி அமெரிக்க நிறுவனங்கள் இடம்பெற்றுள்ளன. குறிப்பாக கூகுள் (Google), மைக்ரோசாப்ட் (Microsoft), ஆப்பிள் (Apple), இன்டெல் (Intel), ஐபிஎம் (IBM), டெஸ்லா (Tesla) மற்றும் போயிங் (Boeing) போன்ற நிறுவனங்கள் ஈரானின் இலக்குகளாக அறிவிக்கப்பட்டுள்ளன. மேலும், அமேசான் வெப் சர்வீசஸ் (AWS), லாக்ஹீட் மார்ட்டின் மற்றும் எக்ஸான் மோபில் போன்ற எரிசக்தி மற்றும் பாதுகாப்புத் துறை நிறுவனங்களும் இதில் அடங்கும். இந்த நிறுவனங்களில் பணிபுரியும் ஊழியர்கள் தங்கள் உயிரைப் பாதுகாத்துக் கொள்ள உடனடியாக அலுவலகங்களை விட்டு வெளியேறுமாறு ஈரான் அறிவுறுத்தியுள்ளது.

அமெரிக்காவின் ‘ஆபரேஷன் எபிக் பியூரி’ (Operation Epic Fury) நடவடிக்கையில் இந்த நிறுவனங்கள் மறைமுகமாக உதவி வருவதாக ஈரான் குற்றம் சாட்டுகிறது. குறிப்பாக, இஸ்ரேல் மற்றும் அமெரிக்கா நடத்தும் இலக்கு வைக்கப்பட்ட தாக்குதல்களுக்கு (Targeted Assassinations) இந்த நிறுவனங்களின் தொழில்நுட்பங்கள் பயன்படுத்தப்படுவதாக ஈரான் கருதுகிறது. ஏற்கனவே மார்ச் மாத தொடக்கத்தில் ஐக்கிய அரபு அமீரகம் மற்றும் பஹ்ரைனில் உள்ள அமேசான் தரவு மையங்கள் (Data Centers) மீது ட்ரோன் தாக்குதல்கள் நடத்தப்பட்ட நிலையில், தற்போது முழு அளவிலான தாக்குதல் எச்சரிக்கை விடுக்கப்பட்டுள்ளது.

ஏப்ரல் 1, 2026-ஆம் தேதியான இன்று, வளைகுடா நாடுகளில் உள்ள அமெரிக்கத் தூதரகங்கள் மற்றும் வணிக வளாகங்களில் பாதுகாப்பு பலப்படுத்தப்பட்டுள்ளது. சவுதி அரேபியா, ஐக்கிய அரபு அமீரகம் மற்றும் ஓமன் போன்ற நாடுகளில் உள்ள அமெரிக்கக் குடிமக்கள் பாதுகாப்பான இடங்களில் தங்கியிருக்குமாறு அமெரிக்க வெளியுறவுத் துறை அறிவுறுத்தியுள்ளது. ஈரானின் இந்த அதிரடி மிரட்டல் சர்வதேசப் பங்குச்சந்தையில் பெரும் சரிவை ஏற்படுத்தியுள்ளதோடு, வளைகுடா பிராந்தியத்தில் உள்ள பன்னாட்டு நிறுவனங்களின் செயல்பாடுகளையும் முடக்கியுள்ளது.