நடிகர் ரஜினிகாந்த் உள்ளிட்ட பல முன்னணி நட்சத்திரங்களுக்கு நடிப்புப் பயிற்சி அளித்தவரும், தூர்தர்ஷன் தொலைக்காட்சியின் முன்னாள் இயக்குநருமான கே. எஸ். நாராயணசாமி (K. S. கோபாலி) நேற்று காலமானார். அவருக்கு வயது 92.
புனேவில் உள்ள நேஷனல் ஸ்கூல் ஆஃப் டிராமா (National School of Drama – NSD)-வின் முதல் மாணவர்களில் ஒருவராகத் திகழ்ந்தவர் நாராயணசாமி. இவர் டாக்டர் பட்டமும் பெற்றிருந்தார்.
இவர் தூர்தர்ஷன் தொலைக்காட்சியின் முன்னாள் இயக்குநராகவும், திரைப்படக் கல்லூரியில் இயக்குநராகவும் பணியாற்றிப் பல நடிகர்களை உருவாக்கினார்.
இந்தியத் திரைப்பட உலகில் பல முன்னணி நடிகர்களை உருவாக்குவதில் முக்கியப் பங்காற்றிய இவர், குறிப்பாக நடிகர் ரஜினிகாந்திற்கு நடிப்புக் கற்றுக்கொடுத்த குருவாக விளங்கியவர்.
ரஜினிகாந்த் மீது அளவற்ற அன்பு வைத்திருந்த நாராயணசாமிதான், இயக்குநர் சிகரம் கே. பாலச்சந்தர் திரைப்படப் பயிற்சிக் கல்லூரிக்கு வந்தபோது, அவரிடம் ரஜினிகாந்தை தனிப்பட்ட முறையில் அறிமுகம் செய்து வைத்ததாகக் கூறப்படுகிறது.
ரஜினிகாந்த் மட்டுமின்றி, அமிதாப் பச்சன், நாசர், சிரஞ்சீவி, ராதாரவி உள்ளிட்டப் பல உச்ச நட்சத்திரங்களுக்கும், பல்வேறு இயக்குநர்களுக்கும் இவர் நடிப்புப் பயிற்சி அளித்துள்ளார்.
கே. எஸ். நாராயணசாமி (K. S. கோபாலி) நேற்று காலை 6 மணியளவில் தனது 92வது வயதில் காலமானார். அவரது உடல், சென்னையில் உள்ள மந்தைவெளி இல்லத்தில் அஞ்சலிக்காக வைக்கப்பட்டிருந்த நிலையில், நடிகர் ரஜினிகாந்த் நேரில் சென்று அஞ்சலி செலுத்தினார். மேலும், அவரது குடும்பத்தினரைச் சந்தித்து ஆறுதல் கூறினார்.