ரஜினி சார் எல்லாம் சான்ஸே இல்லை! – லோகேஷ் நெகிழ்ச்சி!

சூப்பர் ஸ்டார் ரஜினிகாந்த் நடிப்பில் உருவாகி வரும் ‘கூலி’ திரைப்படம் பற்றிய எதிர்பார்ப்பு விண்ணை முட்டியுள்ளது. லோகேஷ் கனகராஜ் இயக்கத்தில் உருவாகும் இந்தப் படம், ரஜினியின் அடுத்த மெகா ஹிட் ஆக இருக்கும் என்று ரசிகர்கள் ஆவலுடன் எதிர்பார்த்துக் கொண்டிருக்கிறார்கள். இந்நிலையில், படத்தின் இயக்குநர் லோகேஷ் கனகராஜ், ரஜினிகாந்தின் அர்ப்பணிப்பு குறித்தும், இரவு நேர படப்பிடிப்பு குறித்தும் வெளிப்படையாகப் பேசியுள்ளார். இது ரசிகர்களை வியப்பில் ஆழ்த்தியுள்ளது!

74 வயதான ரஜினிகாந்த், ‘கூலி’ படத்திற்காக 45 நாட்களுக்கும் மேலாக இரவு நேரப் படப்பிடிப்பில் (Night Shoot) கலந்து கொண்டுள்ளார். இது குறித்துப் பேசிய லோகேஷ் கனகராஜ், “இந்த வயதில் நள்ளிரவு நேரத்தில் ஷூட்டிங்கில் ரஜினி சார் நடிப்பதைப் பார்த்தால், நானெல்லாம் ஒண்ணுமே இல்லை என்று தோன்றும். இன்னமும் அதிகம் வேலை பார்க்க வேண்டும் என்கிற உத்வேகம் அவரைப் பார்த்தாலே தானாகவே வந்துவிடும்” என்று கூறியுள்ளார். லோகேஷின் இந்த வார்த்தைகள், ரஜினியின் கடுமையான உழைப்பையும், சினிமா மீதான அவரது தீராத அன்பையும் வெளிப்படுத்துகின்றன.

ரஜினிகாந்த் ‘கூலி’ படத்தின் காட்சிகளைப் பார்த்துவிட்டு, “இது எனக்கு ‘தளபதி’ படத்தைப் போல் தோன்றுகிறது” என்று லோகேஷிடம் கூறியதாகக் கூறப்படுகிறது. மணி ரத்னம் இயக்கிய ‘தளபதி’ (1991) லோகேஷின் விருப்பமான ரஜினி படம் என்பதால், இந்த விமர்சனம் அவருக்கு மிகுந்த திருப்தியையும் மகிழ்ச்சியையும் அளித்துள்ளதாம். வணிக ரீதியான வெற்றி மற்றும் கலைத் தரம் இரண்டையும் இணைத்து ‘கூலி’யை உருவாக்க லோகேஷ் முயற்சி செய்துள்ளதாகவும், ரஜினியின் இந்த கருத்து தான் அதைச் சாதித்ததற்கான உறுதிப்படுத்தல் என்றும் தெரிவித்துள்ளார்.

‘கூலி’ படம் குடும்பத்துடன் பார்க்கும் படமாக இருந்தாலும், வன்முறை காட்சிகளில் எந்த சமரசமும் செய்துகொள்ளவில்லை என்று லோகேஷ் கனகராஜ் உறுதிப்படுத்தியுள்ளார். துப்பாக்கிகள், போதைப்பொருட்கள் போன்றவற்றைத் தவிர்ப்பதில்லை என்றும், ரஜினி படங்களில் வழக்கமாக இல்லாத அளவுக்கு அதிக அட்ரினலின் ரஷ் இந்த படத்தில் இருக்கும் என்றும் அவர் கூறியுள்ளார்.

ரஜினி ரசிகர்கள் மட்டுமல்லாது, தமிழ் சினிமா ரசிகர்களுமே ‘கூலி’ படத்தை திரையரங்குகளில் காண ஆவலுடன் காத்திருக்கிறார்கள். சூப்பர் ஸ்டாரின் அசாத்திய உழைப்பும், லோகேஷ் கனகராஜின் தனித்துவமான இயக்கமும் ‘கூலி’யை ஒரு புதிய உச்சத்திற்குக் கொண்டு செல்லும் என்பதில் சந்தேகமில்லை!