நடிகர் விஜய் அரசியல் கட்சி தொடங்கியதிலிருந்து, அவருக்கு எதிரான விமர்சனங்கள் தொடர்ந்து வந்துகொண்டிருக்கின்றன. தனது முதல் மாநாட்டில், அரசியல் எதிரிகளின் பெயரை நேரடியாகக் குறிப்பிட விஜய் தயங்கியதாக எழுந்த விமர்சனங்களுக்கு, மதுரையில் நடந்த இரண்டாவது மாநாட்டில் அவர் அனல் பறக்கும் பேச்சால் பதிலடி கொடுத்தார். ஆனாலும், அவரைத் தொடர்ந்து தாக்கிப் பேசி வருபவர் நாம் தமிழர் கட்சி ஒருங்கிணைப்பாளர் சீமான்.
பச்சோந்தியாக மாறிய சீமான்?
ஆரம்பத்தில், “என் தம்பி” என்று விஜய்யைப் பாராட்டி வந்த சீமான், இப்போது அவரை கடுமையான விமர்சனங்களுக்கு உள்ளாக்கி வருகிறார். சமீபத்தில் திருச்சியில் நடைபெற்ற விஜய்யின் முதல் தேர்தல் பிரச்சாரக் கூட்டத்தில் திரண்ட மக்கள் கூட்டத்தைக் கண்ட சீமான், “நடுரோட்டில் எந்த நடிகர் போனாலும் கூட்டம் வரத்தான் செய்யும். அஜித்துக்கும் நயன்தாராவுக்கும் இதைவிட அதிக கூட்டம் வரும்” என்று விஜய்யை சீண்டினார்.
ப்ளூ சட்டை மாறனின் பதிலடி!
சீமானின் இந்த விமர்சனங்களுக்கு விஜய் ரசிகர்கள் பதிலடி கொடுத்து வரும் நிலையில், பிரபல சினிமா விமர்சகர் ப்ளூ சட்டை மாறன், சீமானை கடுமையாக விமர்சித்துள்ளார். தனது சமூக வலைத்தளப் பக்கத்தில் அவர் குறிப்பிட்டதாவது:
“விஜய்யை சீமான் எவ்வளவு திட்டினாலும், அவர் எந்த எதிர்வினையும் ஆற்றவில்லை. இந்த சாக்கடையில் கால் வைக்காமல், சீமானின் திட்டமிட்ட வெறிப் பேச்சை விஜய் கண்டுகொள்ளவே கூடாது. 15 வருடங்களாக கட்சி நடத்தும் 60 வயது பெரியவர், தன்னைவிட வயதில் இளைய, புதிதாகக் கட்சி ஆரம்பித்த ஒருவரைப் பார்த்து எப்படி வெறி கொண்டுள்ளார் என்பதைப் பாருங்கள்.”
“சில மாதங்களுக்கு முன்பு வரை, ‘விஜய் ஒரு தமிழன். அவர் என்னை ஆதரிக்காவிட்டாலும் அவருக்கு துணையாக நிற்பேன்’ என்று பாசம் பொழிந்த இந்த பச்சோந்தி இப்போது நிறம் மாறிவிட்டது. தமிழக அரசியலில் இருந்து முற்றிலும் அகற்றப்பட வேண்டிய ஒரு அதிதீய சக்தி இது.”
இந்தக் கடுமையான விமர்சனங்கள் சமூக வலைத்தளங்களில் வைரலாகி வருகின்றன. ‘இந்த விமர்சனம் தான் மக்களுக்குத் தேவை’, ‘நீங்கள் ஜெயித்துவிட்டீர்கள் மாறன்’ என்று ரசிகர்கள் பலரும் ப்ளூ சட்டை மாறனுக்கு ஆதரவு தெரிவித்து வருகின்றனர்.
இந்த விவகாரம் தமிழக அரசியலில் மேலும் பரபரப்பை ஏற்படுத்தியுள்ளது.