தமிழகத்தில் தேர்தல் களம் சூடுபிடித்துள்ள நிலையில், நடிகர் விஜய் மற்றும் அவரது ரசிகர்கள் குறித்து முதலமைச்சர் மு.க. ஸ்டாலின் வெளிப்படையாகத் தெரிவித்துள்ள கருத்துக்கள் தற்போது அரசியல் வட்டாரத்தில் பெரும் பரபரப்பை ஏற்படுத்தியுள்ளன.
தொகுதிப் பார்வையிடச் சென்ற முதலமைச்சரிடம், “இளைஞர்கள் ஒரு நடிகரின் பின்னால் (விஜய்) சென்று விபத்துகளைச் சந்திக்கிறார்களே, இதை எப்படிப் பார்க்கிறீர்கள்?” என்று செய்தியாளர்கள் கேள்வி எழுப்பினர். அதற்குப் பதிலளித்த ஸ்டாலின், “நாட்டு மக்கள் இதையெல்லாம் கவனித்துக் கொண்டுதான் இருக்கிறார்கள், இளைஞர்கள் விரைவில் திருந்துவார்கள்” என்று ஒரே போடாகப் போட்டுள்ளார்.
விஜய்யின் அரசியல் வருகை மற்றும் அவரது ‘தமிழக வெற்றி கழகம்’ கட்சியின் செயல்பாடுகள் குறித்து மறைமுகமாக விமர்சித்துள்ள முதலமைச்சர், நடிகர்கள் யார் வந்தாலும் தங்களுக்குக் கவலையில்லை என்றும், மக்கள் எழுச்சியைப் பார்க்கும்போது 234 தொகுதிகளிலும் திமுக கூட்டணி வெற்றி பெறும் என்றும் நம்பிக்கை தெரிவித்துள்ளார். குறிப்பாக, விஜய் ரசிகர்களின் செயல்பாடுகளைத் ‘திருந்துவார்கள்’ என்ற ஒற்றைச் சொல்லில் அவர் கடந்து சென்றது, சமூக வலைதளங்களில் ஆதரவாகவும் எதிராகவும் விவாதிக்கப்பட்டு வருகிறது.
ஏற்கனவே ‘ஜனநாயகன்’ திரைப்படச் சிக்கல்கள் மற்றும் அரசியல் அழுத்தங்கள் காரணமாக விஜய் தரப்பு பரபரப்பில் இருக்கும் வேளையில், ஆளுங்கட்சியின் இந்த விமர்சனம் எரியும் நெருப்பில் எண்ணெய்யை ஊற்றியது போல அமைந்துள்ளது. “நாங்கள் அடிமை ஆட்சி நடத்துபவர்கள் அல்ல” என்று அதிமுகவைச் சாடிய கையோடு, நடிகர்களின் பின்னால் செல்லும் இளைஞர்களுக்கு முதல்வர் விடுத்த இந்த ‘அட்வைஸ்’, வரும் தேர்தலில் திரைத்துறை மற்றும் அரசியல் ஆகியவற்றுக்கு இடையேயான மோதலை இன்னும் தீவிரப்படுத்தும் என எதிர்பார்க்கப்படுகிறது.
