அமெரிக்கா மற்றும் ஈரானுக்கு இடையிலான போர்நிறுத்த ஒப்பந்தம் ஒரு மெல்லிய நூலிழையில் ஊசலாடி வரும் நிலையில், போர் மண்டலத்தின் பல்வேறு பகுதிகளில் துப்பாக்கிச் சூடு மற்றும் தாக்குதல் சம்பவங்கள் நடைபெற்றுள்ளதாகப் பாகிஸ்தான் பிரதமர் ஷேபாஸ் ஷெரீப் தெரிவித்துள்ளார். இது குறித்து தனது ‘X’ சமூக வலைதளப் பக்கத்தில் பதிவிட்டுள்ள அவர், “போர் நடைபெறும் பகுதிகளில் ஒரு சில இடங்களில் போர்நிறுத்த விதிமீறல்கள் பதிவாகியுள்ளன. இது ஒட்டுமொத்த அமைதி முயற்சியின் நோக்கத்தையே சீர்குலைக்கும் வகையில் உள்ளது” என்று எச்சரித்துள்ளார். இந்த விதிமீறல்கள் குறித்துப் பாகிஸ்தான் அரசு உன்னிப்பாகக் கவனித்து வருவதாகவும் அவர் குறிப்பிட்டுள்ளார்.
இந்த ஒப்பந்தத்தை உருவாக்குவதில் முக்கியப் பங்காற்றிய பாகிஸ்தான், தற்போது நிலவும் பதற்றத்தைத் தணிக்கத் தீவிரமாக முயன்று வருகிறது. “அனைத்து தரப்பினரும் மிகுந்த நிதானத்துடன் செயல்படுமாறு நான் மனப்பூர்வமாக வேண்டுகோள் விடுக்கிறேன். எட்டப்பட்டுள்ள இரண்டு வார கால அவகாசத்தை மதிக்க வேண்டும். அப்போதுதான் ராஜதந்திர ரீதியில் இந்த மோதலுக்கு ஒரு நிரந்தரமான மற்றும் அமைதியான தீர்வை எட்ட முடியும்” என்று ஷெரீப் வலியுறுத்தியுள்ளார். குறிப்பாக, இஸ்ரேல் மற்றும் ஈரான் ஆகிய இரு தரப்புமே பரஸ்பரம் ஒருவரை ஒருவர் விதிமீறல் குற்றச்சாட்டுகளால் சாடி வரும் நிலையில் இந்த வேண்டுகோள் விடுக்கப்பட்டுள்ளது.
ஈரானின் லாவன் தீவில் (Lavan Island) உள்ள எண்ணெய் சுத்திகரிப்பு நிலையம் மீது நடத்தப்பட்ட தாக்குதல் மற்றும் லெபனானில் இஸ்ரேல் நடத்தி வரும் வான்வழித் தாக்குதல்கள் ஆகியவை இந்த ஒப்பந்தத்திற்கு மிகப்பெரிய சவாலாக உருவெடுத்துள்ளன. லெபனான் தாக்குதல்கள் தொடர்ந்தால் தாங்கள் ஒப்பந்தத்தில் இருந்து வெளியேறுவோம் என ஈரான் எச்சரித்துள்ளது. அதே வேளையில், சவூதி அரேபியா மற்றும் குவைத் எல்லைப் பகுதிகளில் ஈரான் ஆதரவு குழுக்கள் ட்ரோன் தாக்குதல்களை நடத்தியதாக அமெரிக்கத் தரப்பு குற்றம் சாட்டுகிறது. இத்தகைய செயல்கள் பாகிஸ்தான் முன்னெடுத்துள்ள சமரச முயற்சியைச் சிக்கலாக்கியுள்ளன.
இந்தச் சவால்களுக்கு மத்தியிலும், வரும் வெள்ளிக்கிழமை இஸ்லாமாபாத் நகரில் அமெரிக்கா மற்றும் ஈரான் தூதுக்குழுக்கள் பங்கேற்கும் அமைதிப் பேச்சுவார்த்தை திட்டமிட்டபடி நடைபெறும் என்று பாகிஸ்தான் உறுதிப்படத் தெரிவித்துள்ளது. அமெரிக்காவின் சார்பில் துணை அதிபர் ஜே.டி. வான்ஸ் இந்தப் பேச்சுவார்த்தையில் கலந்து கொள்ள வாய்ப்புள்ளதாகத் தகவல்கள் தெரிவிக்கின்றன. சர்வதேச நாடுகள் அனைத்தும், குறிப்பாக ஐநா மற்றும் சீனா ஆகியவை, இந்தத் தற்காலிகப் போர்நிறுத்தம் ஒரு முழுமையான அமைதி ஒப்பந்தமாக மாற வேண்டும் எனப் பாகிஸ்தானின் முயற்சிக்கு ஆதரவு தெரிவித்துள்ளன.
