யாழ்ப்பாணம், சித்தூர்பதி (செம்மணி – சித்துப்பாத்தி) மனிதப் புதைகுழியில் கண்டெடுக்கப்பட்ட மனித எச்சங்கள் தொடர்பான ஸ்கேன் ஆய்வு அறிக்கை இன்று (ஆகஸ்ட் 14, 2025) நீதிமன்றத்தில் சமர்ப்பிக்கப்படும் என எதிர்பார்க்கப்படுகிறது.
சித்தூர்பதி மனிதப் புதைகுழி தொடர்பான வழக்கு இன்று யாழ்ப்பாணம் நீதவான் நீதிமன்றத்தில் மீண்டும் விசாரணைக்கு வரவுள்ளது.
இரண்டாம் கட்ட அகழ்வுப் பணியின் இரண்டாம் அமர்வில் மீட்கப்பட்ட தடயப் பொருட்கள் மற்றும் எலும்புக்கூடுகள் தொடர்பான அறிக்கையும் நீதிமன்றத்தில் சமர்ப்பிக்கப்படவுள்ளது.
மனிதப் புதைகுழியின் இரண்டாம் கட்ட அகழ்வுப் பணிக்கு நீதிமன்றம் 45 நாட்கள் அனுமதி அளித்திருந்தது.
இந்த அகழ்வுப் பணி மூன்று அமர்வுகளாக நடத்த திட்டமிடப்பட்டிருந்த நிலையில், இரண்டு அமர்வுகள் நிறைவடைந்துள்ளன.
இரண்டாம் அமர்வின் முடிவில் 140 எலும்புக்கூடுகள் அகழ்ந்தெடுக்கப்பட்டுள்ளன. இவற்றில் பல சிறுவர்களின் எலும்புக்கூடுகள் என்பதும் குறிப்பிடத்தக்கது.
எலும்புக்கூடுகளுடன், சிறுவர்களின் ஆடைகள், பொம்மைகள், காலணிகள், புத்தகப்பைகள், பால் போத்தல்கள் போன்ற பல தடயப் பொருட்களும் கண்டெடுக்கப்பட்டுள்ளன.
பாதிக்கப்பட்டோர் சார்பில் ஆஜராகும் சட்டத்தரணி வி.எஸ். நிரஞ்சன், மனிதப் புதைகுழியின் அடுத்த கட்ட அகழ்வுப் பணிக்கான தேதியை இன்று நீதிமன்றத்திடம் இருந்து பெற்றுக்கொள்ள உள்ளதாகத் தெரிவித்துள்ளார்.
