யாழ்ப்பாணத்தை உலுக்கிய செம்மணி – சித்துப்பாத்தி மனித புதைகுழி, மீண்டும் அனைவரின் கவனத்தையும் ஈர்க்கிறது! பல ஆண்டுகளாக புதைந்திருக்கும் மர்மங்களை வெளிக்கொணரும் நோக்கில், இரண்டாம் கட்ட அகழ்வுப் பணிகளின் இரண்டாவது அமர்வு இன்று ஆரம்பமாகிறது.
முன்னதாக, சட்ட மருத்துவ நிபுணர்கள் மற்றும் தொல்லியல் துறையின் அதிர்ச்சியூட்டும் தகவல்களை ஆராய்ந்த யாழ்ப்பாணம் நீதவான் நீதிமன்றம், இந்த முக்கிய அகழ்வுக்கு அனுமதி வழங்கியுள்ளது. இன்று தொடங்கும் இந்த அகழ்வுப் பணிகள் அடுத்த 15 நாட்களுக்கு மும்முரமாக நடைபெறவுள்ளன.
ஏற்கனவே, முதல் கட்ட அகழ்வில் 65 மனித எலும்புக்கூடுகள் கண்டுபிடிக்கப்பட்டபோது இலங்கை தேசமே உறைந்து போனது. இவற்றில், அப்பாவி சிறார்களின் மற்றும் பெண்களின் எலும்புக்கூடுகளும் அடங்கியிருந்தன. அதனுடன், பொம்மைகள், புத்தகப்பைகள் போன்ற பல மர்மமான தடயப் பொருட்களும் மீட்கப்பட்டிருந்தது, இங்கு ஏதோ கொடூரமான சம்பவம் நிகழ்ந்திருக்கலாம் என்ற சந்தேகத்தை வலுப்படுத்தியது.
இதை உறுதிப்படுத்தும் விதமாக, அண்மையில் நடைபெற்ற நீதிமன்ற விசாரணையின் போது, தொல்லியல் துறை பேராசிரியர் ராஜ் சோமதேவ, “செம்மணி- சித்துப்பாத்தியில் ஒரு பாரிய குற்றச்செயல் இடம்பெற்றுள்ளது!” என நீதிமன்றத்தில் பகிரங்கமாக அறிவித்தார்.
இந்த திடுக்கிடும் பின்னணியில், இன்று தொடங்கும் இரண்டாம் கட்ட அகழ்வுப் பணிகள், செம்மணி புதைகுழியின் இருண்ட ரகசியங்களை வெளிச்சத்திற்கு கொண்டு வருமா என்ற கேள்வி அனைவர் மனதிலும் எழுந்துள்ளது. நீதி கிடைக்குமா?
