பிரபல யூடியூபர் மற்றும் அரசியல் விமர்சகரான சவுக்கு சங்கர் கைது செய்யப்பட்டிருப்பது தமிழக அரசியல் வட்டாரத்திலும், சமூக வலைதளங்களிலும் பெரும் பரபரப்பை ஏற்படுத்தியுள்ளது. தயாரிப்பாளர் ஆயிஷா சாதிக் என்பவர் அளித்த புகாரின் அடிப்படையில், சென்னை ஆதம்பாக்கத்தில் உள்ள சவுக்கு சங்கரின் இல்லத்தில் வைத்து காவல்துறையினர் அவரை கைது செய்துள்ளனர். இந்த திடீர் கைது நடவடிக்கை குறித்து எதிர்க்கட்சிகள் கடுமையான விமர்சனங்களை முன்வைத்து வருகின்றன.
தயாரிப்பாளர் ஆயிஷா சாதிக் அளித்த புகாரில், சவுக்கு சங்கர் தன்னை அவதூறாக பேசி மிரட்டி, 2 லட்சம் ரூபாய் பணம் பறித்ததாக குற்றம் சாட்டியுள்ளார். இந்த புகாரின் பேரில், ஆதம்பாக்கம் காவல்துறையினர் வழக்குப்பதிவு செய்து விசாரணை மேற்கொண்டு வந்த நிலையில், சவுக்கு சங்கரை அவரது வீட்டில் வைத்து கைது செய்தனர். இந்த கைது நடவடிக்கையின்போது, காவல்துறையினர் வீட்டின் கதவுகளை உடைத்து உள்ளே சென்றதாக தகவல் வெளியாகி உள்ளது.
இந்த கைது குறித்து பாஜக மாநிலத் தலைவர் நயினார் நாகேந்திரன் அவர்கள் தனது ‘எக்ஸ்’ (X) சமூக வலைதளப் பக்கத்தில் கண்டனம் தெரிவித்துள்ளார். அவர் தனது பதிவில், “கருத்து சுதந்திரத்தின் கழுத்தை நெரிக்கும் பாசிச திமுக அரசு. கடப்பாறையை வைத்து வீட்டின் கதவை உடைத்து ஊடகவியலாளர் சவுக்கு சங்கரை திமுக அரசின் ஏவல்துறை கைது செய்துள்ளது மிகுந்த கண்டனத்திற்குரியது. ஒரு ஊடகவியலாளரைத் தீவிரவாதியைப் போல கைது செய்யும் அளவிற்கு அப்படி என்ன அவசியம் நேர்ந்தது?” எனக் கடுமையாகக் கேள்வி எழுப்பியுள்ளார்.
பணம் கேட்டு மிரட்டிய புகாரின் பேரில் சவுக்கு சங்கர் கைது செய்யப்பட்டிருந்தாலும், காவல்துறையின் இந்த அதிரடி நடவடிக்கையும், வீட்டின் கதவை உடைத்து அவரை கைது செய்த விதம் குறித்தும் எதிர்க்கட்சிகள் தொடர்ந்து கேள்விகளை எழுப்பி வருகின்றன. மேலும், அவரது கைது நடவடிக்கையானது கருத்துச் சுதந்திரத்தை ஒடுக்கும் செயல் என்றும் குற்றம் சாட்டப்பட்டுள்ளது. தமிழக அரசியல் களம் மற்றும் சமூக வலைதளங்களில் சவுக்கு சங்கரின் இந்த கைது விவகாரம் முக்கிய பேசுபொருளாக மாறியுள்ளது.