உகாண்டா அதிபர் யோவேரி முசெவேனியின் மகனும், அந்நாட்டின் பாதுகாப்புப் படைத் தளபதியுமான ஜெனரல் முஹூசி கைனெருகபா, துருக்கி நாட்டிற்கு எதிராகச் சமூக வலைதளங்களில் அதிரடி நிபந்தனைகளை விதித்துள்ளார். சோமாலியாவில் கடந்த 20 ஆண்டுகளாக அல்-ஷபாப் பயங்கரவாதிகளுக்கு எதிராக உகாண்டா ராணுவம் போராடி வருவதாகவும், இதனால் அங்கு ஏற்பட்ட அமைதியைச் சாதகமாகப் பயன்படுத்தி துருக்கி நூற்றுக்கணக்கான மில்லியன் டாலர்களைப் லாபமாகப் ஈட்டியுள்ளதாகவும் அவர் குற்றம் சாட்டியுள்ளார். எனவே, உகாண்டாவின் பாதுகாப்புச் சேவைக்கு ‘டிவிடெண்ட்’ (Security Dividend) தொகையாக துருக்கி 1 பில்லியன் டாலர்களை (சுமார் ரூ.8,400 கோடி) வழங்க வேண்டும் என அவர் வலியுறுத்தியுள்ளார்.
பணத்துடன் நிற்காமல், தனது இரண்டாவது கோரிக்கையாக, “துருக்கி நாட்டின் மிக அழகான பெண்ணை எனக்கு மனைவியாகத் தர வேண்டும்” என்ற வினோதமான நிபந்தனையையும் அவர் முன்வைத்துள்ளார். இந்த நிபந்தனைகளை துருக்கி அரசு 30 நாட்களுக்குள் நிறைவேற்றாவிட்டால், உகாண்டாவில் உள்ள துருக்கி தூதரகம் மூடப்படும் என்றும், இரு நாடுகளுக்கும் இடையிலான தூதரக உறவுகள் துண்டிக்கப்படும் என்றும் அவர் எச்சரித்துள்ளார். மேலும், துருக்கி ஏர்லைன்ஸ் விமானங்கள் உகாண்டா வான்வெளியில் பறக்கத் தடை விதிக்கப்படும் என்றும் அவர் தனது எக்ஸ் (X) தளத்தில் பதிவிட்டுள்ளார்.
ஜெனரல் முஹூசி இத்தகைய சர்ச்சைக்குரிய மற்றும் பாலியல் ரீதியான கருத்துகளை வெளியிடுவது இது முதல் முறையல்ல. கடந்த 2022-ஆம் ஆண்டு, இத்தாலி பிரதமர் ஜார்ஜியா மெலோனியைத் திருமணம் செய்து கொள்ள 100 பசுக்களைத் தருவதாகக் கூறிப் பரபரப்பை ஏற்படுத்தினார். அதேபோல், அண்டை நாடான கென்யாவை இரண்டே வாரங்களில் தனது ராணுவம் கைப்பற்றும் என்று பதிவிட்டதற்காக, அவரது தந்தை அவரைப் பதவியிலிருந்து நீக்கிவிட்டு கென்யாவிடம் மன்னிப்பு கேட்டது குறிப்பிடத்தக்கது. தற்போது மீண்டும் அவர் துருக்கியைத் வம்புக்கு இழுத்திருப்பது உகாண்டாவின் அதிகாரப்பூர்வ நிலைப்பாடா அல்லது அவரது தனிப்பட்ட கருத்தா என்ற குழப்பம் நிலவுகிறது.
தற்போது இஸ்லாமாபாத்தில் அமெரிக்கா மற்றும் ஈரான் இடையே பதற்றமான சூழல் நிலவி வரும் வேளையில், உகாண்டா தளபதியின் இந்த மிரட்டல் ஆப்பிரிக்கப் பிராந்தியத்தில் புதிய பரபரப்பை உருவாக்கியுள்ளது. துருக்கி தரப்பிலிருந்து இதுவரை இதற்கு எவ்வித அதிகாரப்பூர்வ பதிலும் அளிக்கப்படவில்லை. “ட்விட்டர் விளையாட்டுகளை மறந்துவிடுங்கள், எங்கள் பிரச்சனைகளைத் தீர்க்காவிட்டால் உறவை முறிப்போம்” என்று அவர் பிடிவாதமாக இருப்பதால், உகாண்டா அரசு தனது தளபதியின் கருத்திற்கு விளக்கம் அளிக்க வேண்டிய நெருக்கடியில் உள்ளது.
