குவைத்தில் உள்ள ஷுவைபா (Shuaiba) துறைமுகத்தில் நிலைநிறுத்தப்பட்டிருந்த அமெரிக்க ராணுவப் பிரிவு மீது கடந்த மார்ச் 1, 2026 அன்று ஈரான் நடத்திய ட்ரோன் தாக்குதல் குறித்து தப்பிப் பிழைத்த வீரர்கள் முதல்முறையாக வாய் திறந்துள்ளனர். இந்தத் தாக்குதல் குறித்து அமெரிக்கப் பாதுகாப்புச் செயலர் பீட் ஹெக்செத் (Pete Hegseth) கூறுகையில், “நன்கு பலப்படுத்தப்பட்ட பாதுகாப்பு அரண்களை மீறி ஒரு ட்ரோன் மட்டும் ஊடுருவியது” எனத் தெரிவித்திருந்தார். ஆனால், இதனை ராணுவ வீரர்கள் மறுத்துள்ளனர். “பாதுகாப்பு பலப்படுத்தப்பட்டது என்பது முற்றிலும் பொய்; எங்கள் பிரிவு எவ்விதத் தற்காப்பும் இன்றித் தாக்குதலுக்கு ஆளாகும் வகையில் பாதுகாப்பற்ற நிலையில் விடப்பட்டிருந்தது” என்று காயமடைந்த வீரர்கள் சிபிஎஸ் (CBS) செய்தி நிறுவனத்திற்கு அளித்த பேட்டியில் குற்றம் சாட்டியுள்ளனர்.
இந்தத் தாக்குதல் நடந்த விநாடிகளை விவரித்த ஒரு வீரர், “சுமார் 900 அடி தொலைவில் விழுந்து வெடித்த அந்தத் தாக்குதல் ஒரு சினிமா காட்சியைப் போல இருந்தது. காதுகளில் இரைச்சல், கண் முன்னே தூசியும் புகையும் மண்டியிருந்தது” என்று கூறினார். இந்தத் தாக்குதலில் 6 அமெரிக்க வீரர்கள் உயிரிழந்தனர் மற்றும் 20-க்கும் மேற்பட்டோர் படுகாயமடைந்தனர். பெண்டகன் அதிகாரிகள் கூறுவது போல அது ஒரு “சிறு ஓட்டை வழியாக ஊடுருவிய” தாக்குதல் அல்ல, மாறாகப் பாதுகாப்பு குறைபாடுகளால் ஏற்பட்ட நேரடித் தாக்குதல் என்றும், உண்மையைச் சொல்வது எதிர்காலத் தவறுகளைத் தவிர்க்க உதவும் என்றும் வீரர்கள் ஆதங்கத்துடன் தெரிவித்துள்ளனர்.
அமெரிக்க ராணுவம் தனது வீரர்களை ஈரான் எல்லைக்கு மிக அருகில், பாதுகாப்பற்ற பகுதியில் நிலைநிறுத்தியது ஏன் என்ற கேள்வியை உயிருடன் மீண்ட வீரர்கள் எழுப்பியுள்ளனர். வெறும் மணல் மூட்டைகள் மற்றும் சாதாரண தடுப்புகளை மட்டுமே கொண்டு அணுசக்தித் திறன் கொண்ட ஒரு நாட்டின் தாக்குதலை எதிர்கொள்ளத் தங்களைப் பணித்தது மிகப்பெரிய தவறு என்று அவர்கள் சுட்டிக்காட்டியுள்ளனர். 2021-க்குப் பிறகு அமெரிக்க ராணுவம் சந்தித்த மிக மோசமான மற்றும் உயிர்ச்சேதம் மிகுந்த இந்தத் தாக்குதலைத் தடுத்திருக்க முடியும் என்பது வீரர்களின் கருத்தாக உள்ளது.
தற்போது இந்த விவகாரம் தொடர்பாகப் பெண்டகன் ரகசிய விசாரணை நடத்தி வருவதால், வீரர்கள் தங்களது பெயர்களை வெளியிட விரும்பவில்லை. இருப்பினும், அரசுத் தரப்பில் கூறப்படும் தகவல்கள் கள நிலவரத்திற்கு முரணாக இருப்பதை அவர்கள் புகைப்படங்கள் மற்றும் வீடியோ ஆதாரங்களுடன் நிரூபித்துள்ளனர். இந்த விவகாரம் அமெரிக்க அரசியலில் பெரும் புயலைக் கிளப்பியுள்ளதுடன், டொனால்ட் டிரம்ப் தலைமையிலான நிர்வாகத்திற்கு ராணுவ ரீதியாகப் புதிய நெருக்கடியை உருவாக்கியுள்ளது.
