அமெரிக்கா மற்றும் ஈரான் இடையிலான ஆறு வார காலப் போரை முடிவுக்குக் கொண்டு வரும் நோக்கில், பாகிஸ்தான் முன்னிலையில் இன்று (ஏப்ரல் 11, 2026) வரலாற்றுச் சிறப்புமிக்க அமைதிப் பேச்சுவார்த்தை தொடங்குகிறது. இதற்காக அமெரிக்க அதிபர் டொனால்ட் டிரம்ப்பால் நியமிக்கப்பட்ட உயர்மட்டக் குழுவுடன் துணை அதிபர் ஜே.டி. வான்ஸ் இஸ்லாமாபாத் அருகே உள்ள நூர் கான் விமானப்படை தளத்தில் இன்று காலை இறங்கினார். இவரைப் பாகிஸ்தான் ராணுவத் தளபதி ஆசிம் முனீர் நேரில் வரவேற்றார். இந்தப் பேச்சுவார்த்தையில் டிரம்ப்பின் சிறப்புத் தூதர் ஸ்டீவ் விட்காஃப் மற்றும் மருமகன் ஜாரெட் குஷ்னர் ஆகியோரும் பங்கேற்கின்றனர்.
பாகிஸ்தான் பிரதமர் ஷேபாஸ் ஷெரீப் இந்தப் பேச்சுவார்த்தையை “வாழ்வா சாவா” (Make-or-break) போராட்டம் என்று வருணித்துள்ளார். வான்ஸ் பாகிஸ்தான் புறப்படுவதற்கு முன்னதாகவே, “ஈரான் எங்களை ஏமாற்றவோ அல்லது விளையாடவோ நினைத்தால் (Don’t play us), பேச்சுவார்த்தை குழு அதனைச் சகித்துக்கொள்ளாது” எனத் தனது எச்சரிக்கையைப் பதிவு செய்திருந்தார். ஈரான் தரப்பில் நாடாளுமன்றச் சபாநாயகர் முகமது பாகர் கலிபாப் மற்றும் வெளியுறவுத் துறை அமைச்சர் அப்பாஸ் அரகச்சி ஆகியோர் பேச்சுவார்த்தைக்காக ஏற்கனவே இஸ்லாமாபாத் வந்தடைந்துள்ளனர்.
ஈரான் தரப்பில் முன்வைக்கப்படும் முக்கிய நிபந்தனைகளில் லெபனானில் இஸ்ரேலியத் தாக்குதல்களை நிறுத்துவது மற்றும் அமெரிக்காவால் முடக்கப்பட்டுள்ள ஈரானின் சொத்துக்களை விடுவிப்பது ஆகியவை அடங்கும். ஆனால், லெபனான் விவகாரத்தை இந்தப் பேச்சுவார்த்தையுடன் இணைக்க அமெரிக்கா மறுத்துள்ளது. இதற்கிடையில், ஹார்முஸ் ஜலசந்தியைத் திறப்பது மற்றும் ஈரான் அணு ஆயுதங்களை உருவாக்குவதைத் தடுப்பதே தங்களின் முதல் முன்னுரிமை என அதிபர் டிரம்ப் தெரிவித்துள்ளார். அமைதிப் பேச்சுவார்த்தை தோல்வியடைந்தால் மீண்டும் தாக்குதல் நடத்தப்படும் என அவர் எச்சரித்துள்ளதால் பெரும் பதற்றம் நிலவுகிறது.
தற்போது இஸ்லாமாபாத் நகரின் முக்கியப் பகுதிகள் சீல் வைக்கப்பட்டு, பலத்த பாதுகாப்புப் போடப்பட்டுள்ளது. அமெரிக்கா மற்றும் ஈரான் இடையே 1979-ஆம் ஆண்டுக்குப் பிறகு நடைபெறும் மிக உயர்ந்த மட்டத்திலான நேரடித் தொடர்பு இது என்பதால், உலகம் முழுவதும் இந்தப் பேச்சுவார்த்தையின் முடிவுகளை எதிர்பார்த்துக் காத்திருக்கிறது. ஈரான் மீது சீனா ராணுவத் தளவாடங்களை அனுப்பத் தயாராகி வருவதாக உளவுத் தகவல்கள் வெளியாகியுள்ள நிலையில், இந்தப் பேச்சுவார்த்தை வெற்றியடைவது உலகப் பொருளாதாரத்திற்கும் அமைதிக்கும் மிக அவசியமாகக் கருதப்படுகிறது.
