அமெரிக்க அதிபர் டொனால்ட் ட்ரம்ப் கிரீன்லாந்தை வாங்குவதற்காக ஐரோப்பிய நாடுகள் மீது விதித்துள்ள கடுமையான வர்த்தக வரிகளை (Tariffs) எதிர்த்து, பிரான்ஸ் அதிபர் இம்மானுவேல் மக்ரோன் போர்க்கொடி தூக்கியுள்ளார். டாவோஸ் உலகப் பொருளாதார மன்றத்தில் உரையாற்றிய அவர், பலம் வாய்ந்தவர்கள் சொல்வதே சட்டம் என்ற நிலையை ஐரோப்பா ஒருபோதும் ஏற்காது என்று திட்டவட்டமாகத் தெரிவித்தார். அமெரிக்காவின் இத்தகைய போக்கிற்கு அடிபணிவது என்பது ஐரோப்பாவை வாஷிங்டனின் “அடிமை நாடாக” (Vassalization) மாற்றுவதற்குச் சமம் என்று அவர் எச்சரித்துள்ளார்.
கிரீன்லாந்தை அமெரிக்காவிடம் ஒப்படைக்க மறுக்கும் டென்மார்க், பிரான்ஸ், ஜெர்மனி உள்ளிட்ட எட்டு ஐரோப்பிய நாடுகள் மீது ட்ரம்ப் 10% இறக்குமதி வரி விதித்துள்ளார். வரும் ஜூன் மாதத்திற்குள் கிரீன்லாந்து விவகாரத்தில் ஒப்பந்தம் ஏற்படாவிட்டால், இந்த வரியை 25% ஆக உயர்த்தப்போவதாகவும் அவர் மிரட்டல் விடுத்துள்ளார். இது ஐரோப்பாவின் ரசாயன மற்றும் வாகனத் தொழில்துறையை முடக்கும் முயற்சி என்று சாடிய மக்ரோன், “பாண்டோரா பெட்டியைத் திறந்து ஆபத்தை விலைக்கு வாங்க வேண்டாம்” என்று அமெரிக்காவை எச்சரித்தார்.
அமெரிக்காவின் இந்த மிரட்டலைச் சமாளிக்க ஐரோப்பிய ஒன்றியம் தனது சக்திவாய்ந்த ஆயுதமான “Anti-Coercion Instrument” (ACI) எனப்படும் பொருளாதாரத் தடுப்பு கருவியை முதன்முறையாகப் பயன்படுத்தத் தயாராகி வருகிறது. இதனை அரசியல் வட்டாரத்தில் “ட்ரேட் பசூக்கா” (Trade Bazooka) என்று அழைக்கிறார்கள். இந்தச் சட்டத்தின் மூலம், அமெரிக்க நிறுவனங்கள் ஐரோப்பிய சந்தையில் நுழைவதைத் தடுக்கவும், அவற்றின் முதலீடுகளைக் கட்டுப்படுத்தவும், அறிவுசார் சொத்துரிமைகளை (Intellectual Property Rights) ரத்து செய்யவும் ஐரோப்பிய ஒன்றியத்திற்கு அதிகாரம் கிடைக்கும்.
மேலும், சுமார் 93 பில்லியன் யூரோ (109 பில்லியன் டாலர்) மதிப்பிலான அமெரிக்கப் பொருட்களுக்குப் பதிலடி வரிகள் விதிக்கவும் ஐரோப்பா திட்டமிட்டுள்ளது. கடந்த ஆண்டு அமெரிக்காவுடன் ஏற்பட்ட தற்காலிக வர்த்தக ஒப்பந்தத்தின்படி நிறுத்தி வைக்கப்பட்டிருந்த இந்த வரிகள், வரும் பிப்ரவரி 6-ஆம் தேதி முதல் மீண்டும் அமலுக்கு வரலாம் என்று எதிர்பார்க்கப்படுகிறது. ட்ரம்ப் ஆகஸ்ட் 2025-இல் செய்துகொண்ட “டர்ன்பெர்ரி” (Turnberry) ஒப்பந்தத்தை மீறிச் செயல்படுவதாக ஐரோப்பியத் தலைவர்கள் குற்றம் சாட்டுகின்றனர்.
இந்த விவகாரம் குறித்து விவாதிக்க ஐரோப்பிய ஒன்றியத் தலைவர்கள் வரும் வியாழக்கிழமை அவசரக் கூட்டத்தைக் கூட்டியுள்ளனர். நேட்டோ (NATO) அமைப்பிற்குள் மிகப்பெரிய பிளவை ஏற்படுத்தியுள்ள இந்த கிரீன்லாந்து விவகாரம், உலக வர்த்தகப் போராக உருவெடுக்கும் அபாயம் ஏற்பட்டுள்ளது. “சர்வதேச சட்டம் என்பது ஒரு விளையாட்டு அல்ல” என்று கிரீன்லாந்து பிரதமர் தெரிவித்துள்ள நிலையில், மக்ரோனின் இந்த ஆவேசமான பேச்சு ஐரோப்பிய நாடுகளிடையே பெரும் வரவேற்பைப் பெற்றுள்ளது.
