பிரிட்டனில் ஊடுருவிய தாலிபான்கள்? – ரகசியத்தை உடைத்த முன்னாள் பாதுகாப்புச் செயலர்:

பிரிட்டனில் ஊடுருவிய தாலிபான்கள்? – ரகசியத்தை உடைத்த முன்னாள் பாதுகாப்புச் செயலர்: 7 பில்லியன் பவுண்ட் இழப்பீட்டில் சிக்கிய அரசு!

ஆப்கானிஸ்தானில் இருந்து வெளியேறியபோது நடந்த குழப்பத்தைப் பயன்படுத்தி, தாலிபான் தீவிரவாதிகள் சிலர் அகதிகள் என்ற போர்வையில் பிரிட்டனுக்குள் நுழைந்திருக்க வாய்ப்புள்ளதாக அந்நாட்டின் முன்னாள் பாதுகாப்புச் செயலர் சர் பென் வாலஸ் (Sir Ben Wallace) பகிரங்கமாக ஒப்புக்கொண்டுள்ளார். 2021-ஆம் ஆண்டு காபூல் வீழ்ந்தபோது நடைபெற்ற அவசர கால வெளியேற்றத்தின்போது (Operation Pitting), முறையான பாதுகாப்பு சோதனைகள் இன்றி சிலர் உள்ளே நுழைந்திருக்கலாம் என்ற அச்சத்தை அவர் நாடாளுமன்ற பாதுகாப்பு நிலைக்குழுவிடம் தெரிவித்துள்ளார்.

இந்த விவகாரம் பிரிட்டன் அரசியலில் பெரும் புயலைக் கிளப்பியுள்ளது. குறிப்பாக, 2022-ஆம் ஆண்டு பாதுகாப்பு அமைச்சகத்தால் நேரிட்ட மிகப்பெரிய “தகவல் கசிவு” (Data Leak) இந்த விவகாரத்தை மேலும் சிக்கலாக்கியுள்ளது. பிரிட்டனிடம் தஞ்சம் கோரிய சுமார் 1,00,000 ஆப்கானியர்களின் தனிப்பட்ட விபரங்கள் தவறுதலாக கசிந்ததால், அவர்கள் தாலிபான்களால் கொல்லப்படும் அபாயம் ஏற்பட்டது. இதனை மறைக்க அரசு பல ஆண்டுகளாக ஒரு “ரகசிய தடை உத்தரவை” (Superinjunction) நீதிமன்றம் மூலம் பெற்று மூடி மறைத்தது தற்போது அம்பலமாகியுள்ளது.

இந்தத் தகவல் கசிவு காரணமாக, பாதிக்கப்பட்டவர்களுக்கு இழப்பீடு வழங்கவும், அவர்களை ரகசியமாக பிரிட்டனுக்கு அழைத்து வரவும் அரசுக்கு சுமார் 7 பில்லியன் பவுண்ட் (சுமார் 77,000 கோடி ரூபாய்) செலவாகும் என்று மதிப்பிடப்பட்டுள்ளது. இந்தத் தொகை பிரிட்டிஷ் வரி செலுத்துவோரின் பணத்திலிருந்து செலவிடப்படுவதால் பொதுமக்கள் கடும் கொதிப்பில் உள்ளனர். “தாலிபான்களுக்கு எதிராகப் பணியாற்றியவர்களைக் காக்கப் போய், தாலிபான்களே நாட்டுக்குள் வர வழிவகுத்துவிட்டோமோ?” என்ற கேள்வி நாடாளுமன்றத்தில் எழுப்பப்பட்டது.

சர் பென் வாலஸ் தனது சாட்சியத்தில், “மிகப்பெரிய அளவிலான வெளியேற்றத்தின்போது எல்லா விபரங்களையும் சரியாகச் செய்வது கடினம். நாங்கள் முடிந்தவரை சோதனைகளை நடத்தினோம், ஆனால் தகவல் கசிவு ஏற்பட்ட பிறகு பாதுகாப்புத் தரம் குறைந்ததா என்பது எனக்குத் தெரியாது” என்று கூறினார். குறிப்பாக, ‘Operation Rubific’ என்ற பெயரில் நடத்தப்பட்ட ரகசிய ஏர்லிஃப்ட் நடவடிக்கைகள் மூலம் ஆயிரக்கணக்கானோர் பிரிட்டனுக்கு அழைத்து வரப்பட்டது இதுவரை ரகசியமாகவே வைக்கப்பட்டிருந்தது.

தற்போது சுமார் 1,000 ஆப்கானிய அகதிகள் பிரிட்டன் அரசுக்கு எதிராக வழக்குத் தொடர்ந்துள்ளனர். தகவல் கசிவு காரணமாகத் தங்களது உறவினர்கள் தாலிபான்களால் கொல்லப்பட்டதாகவும், அதற்கு அரசுதான் பொறுப்பேற்க வேண்டும் என்றும் அவர்கள் இழப்பீடு கோரியுள்ளனர். பாதுகாப்பு அமைச்சகத்தின் இந்த மெத்தனப் போக்கு தேசிய பாதுகாப்பிற்கு மிகப்பெரிய அச்சுறுத்தலை ஏற்படுத்தியுள்ளதாக எதிர்க்கட்சிகள் குற்றம் சாட்டியுள்ளன.