கடலின் ஆழத்தில் மௌனமாகக் கொலை செய்து கொண்டிருக்கும், கைவிடப்பட்ட மீன்பிடி வலைகள் எனப்படும் ‘பேய் வலைகளை’ (Ghost Nets) கிரேக்க நீர்மூழ்கிக் குழு ஒன்று வீரதீரமாக வேட்டையாடி வருவது உலகையே அதிர்ச்சிக்குள்ளாக்கியுள்ளது.
சப்யென்ட்ஸா தீவு (Sapientza Island) அருகே, நீர்மூழ்கிக் குழுவினர் நடத்திய அதிரடி நடவடிக்கையில், கடலுக்குள் திரைச்சீலைகள் போலப் படர்ந்து கிடந்த டன் கணக்கிலான இந்த மரணப் பொறிகளை அகற்றினர்.
ஏன் இவை பேய் வலைகள்?
- மீனவர்களால் கைவிடப்பட்ட அல்லது கடலில் அறுந்துபோன இந்த வலைகள், ஆண்டுக்கணக்கில் கடலில் அலைந்து திரிகின்றன.
- இவை, கண்ணில் படாமல் திடீரெனப் பெரிய திமிங்கலங்கள், ஆமைகள், டால்பின்கள் மற்றும் பல அறிய வகை மீன்களையும் சிக்கவைத்து, மூச்சுத் திணறடித்து மெதுவாகக் கொன்றுவிடுகின்றன.
- ஒரு தன்னார்வலர் கூறியது போல், “இந்த வலைகள் அடிப்படையில் கடலில் ஒரு ‘மரண மண்டலத்தை’ உருவாக்குகின்றன; அங்கு எந்த உயிரினமும் வாழ முடியாது.”
அதிர்ச்சித் தகவல்:
இந்த வலைகள் சிதைந்து, கண்ணுக்குத் தெரியாத ‘மைக்ரோபிளாஸ்டிக்ஸ்’ (Microplastics) ஆக மாறி, கடல் நீரை விஷமாக்குகின்றன. இவை இறுதியில் உணவுச் சங்கிலி வழியாக மனிதர்களுக்குள்ளும் நுழையும் அபாயம் இருப்பதாக விஞ்ஞானிகள் எச்சரிக்கின்றனர்.
உயிர்காக்கும் போராட்டம்:
- ‘ஏஜியன் ரீபிரீத்’ (Aegean Rebreath) என்ற சுற்றுச்சூழல் குழுவின் நீர்மூழ்கியாளர்கள், தங்கள் உயிரைப் பணயம் வைத்து, ஆழ்கடலுக்குள் சென்று, கயிறுகள் மற்றும் காற்று நிரப்பப்பட்ட பைகளை இணைத்து இந்த வலைகளை வெளியே கொண்டு வருகின்றனர்.
- மீன்பிடி நிறுவனங்களின் பொறுப்பற்ற செயலால் ஏற்பட்ட இந்தச் சுற்றுச்சூழல் பேரழிவைத் தடுக்க, அரசாங்கம் உடனடியாகக் கடுமையான சட்டங்களைக் கொண்டு வர வேண்டும் எனச் சமூக ஆர்வலர்கள் கோரிக்கை விடுத்துள்ளனர்.
கிரேக்கக் கடற்பரப்பை உயிரினங்களின் கல்லறை ஆக்கும் இந்த ‘பேய் வலைகளை’ அகற்றும் இந்த வீரமிக்கப் பணி, உலகெங்கிலும் உள்ள கடல் ஆர்வலர்களின் கண்ணீரைத் துடைத்துள்ளது!
