சர்வதேசப் போர்? சீனா சீற்றம்! அமெரிக்காவுக்கு எச்சரிக்கை! தக்க பதிலடி கொடுப்போம் !

சர்வதேசப் போர்? ரஷ்யாவிற்கு அபராதம்? அமெரிக்காவுக்கு நேரடியாகச் சவால் விட்ட சீனா! போர்க்களமாக மாறும் உலக வர்த்தகம்!

பெய்ஜிங்: உக்ரைன் போருக்கு மத்தியில் ரஷ்யாவுடன் வர்த்தகம் செய்துவரும் நாடுகள் மீது புதிய வரிகளை விதிக்க அமெரிக்கா முயன்றுவருவதால், அதற்கு சீனா கடும் கண்டனம் தெரிவித்துள்ளது. “எங்கள் நலன்களுக்குப் பாதிப்பு ஏற்பட்டால் தக்க பதிலடி கொடுப்போம்!” என அமெரிக்காவிற்கு சீனா நேரடியாக எச்சரிக்கை விடுத்துள்ளது.

ட்ரம்பின் திட்டம் என்ன?

அமெரிக்க அதிபர் டொனால்ட் ட்ரம்ப், ரஷ்யாவுக்கு எதிராக அழுத்தம் கொடுக்கும் வகையில், ஜி-7 மற்றும் நேட்டோ நாடுகளைக் கொண்டு புதிய வர்த்தக வரிகளை விதிக்க முயற்சி செய்துவருகிறார். குறிப்பாக, ரஷ்ய எண்ணெயை இறக்குமதி செய்யும் சீனா மற்றும் இந்தியா போன்ற நாடுகள் மீது 50 முதல் 100% வரை வரி விதிக்க வேண்டும் என்று வாஷிங்டன் கோரியுள்ளது. ஐரோப்பிய ஒன்றியத்திற்கும் இந்த யோசனையை முன்வைத்து, இந்த நடவடிக்கையின் மூலம் ரஷ்யாவின் பொருளாதாரத்தைப் பலவீனப்படுத்த முடியும் என ட்ரம்ப் நம்புகிறார்.

சீனாவின் வெடித்த எதிர்வினை!

இந்த நடவடிக்கைக்கு சீனா கடுமையான கண்டனத்தைப் பதிவு செய்துள்ளது. சீனாவின் வெளியுறவுத் துறை செய்தித் தொடர்பாளர் லின் ஜியான், “அனைத்து நாடுகளுடனும் இயல்பான பொருளாதார, வர்த்தக உறவுகளைப் பேணுவது பெய்ஜிங்கின் முழுமையான உரிமை. இது சர்வாதிகாரமும், அச்சுறுத்தலும், பொருளாதார மிரட்டலும் ஆகும். இந்த அழுத்தம் எந்த மனதையும் வெல்லாது, எந்தப் பிரச்சினையையும் தீர்க்காது” என ஆவேசமாகக் கூறியுள்ளார்.

மேலும், உக்ரைன் போரில் சீனாவின் நிலைப்பாடு எப்போதும் “நியாயமானது” என்றும், பேச்சுவார்த்தை மட்டுமே ஒரே வழி என்றும் அவர் குறிப்பிட்டார். “சட்டவிரோதமான ஒருதலைப்பட்ச தடைகளையும், அதிகார வரம்பு அச்சுறுத்தல்களையும் நாங்கள் உறுதியாக எதிர்க்கிறோம். எங்கள் உரிமைகளுக்கும் நலன்களுக்கும் தீங்கு விளைவித்தால், எங்கள் இறையாண்மை, பாதுகாப்பு மற்றும் வளர்ச்சி நலன்களைப் பாதுகாக்க உறுதியான எதிர் நடவடிக்கைகளை எடுப்போம்” என அவர் எச்சரித்தார்.

இந்தியாவின் நிலை மற்றும் ரஷ்யாவின் குரல்!

ஃபைனான்சியல் டைம்ஸ் பத்திரிகை வெளியிட்ட தகவலின்படி, ரஷ்ய எண்ணெயை வாங்குவதற்காக சீனா மீது இரண்டாம் நிலைத் தடைகளை விதிப்பது குறித்து ஐரோப்பிய ஒன்றிய அதிகாரிகளும் ஆரம்பகட்ட பேச்சுவார்த்தையில் ஈடுபட்டுள்ளனர். ஆனாலும், அமெரிக்காவின் ஆதரவு இல்லாமல் அவர்கள் எந்த முடிவையும் எடுக்க விரும்பவில்லை.

உக்ரைன் போர் தொடங்கிய 2022-ஆம் ஆண்டு முதல், ரஷ்யாவின் கச்சா எண்ணெய்க்கு சீனாவும் இந்தியாவும் மிகப்பெரிய வாடிக்கையாளர்களாக மாறியுள்ளன. அண்மையில், பெய்ஜிங்கிற்கு சென்றிருந்த ரஷ்ய அதிபர் விளாடிமிர் புடின், அதிக மக்கள் தொகை கொண்ட சீனா, இந்தியா போன்ற நாடுகளை ஏற்றுக்கொள்ள முடியாத தொனியில் பேச வேண்டாம் என மேற்கத்திய நாடுகளுக்கு எச்சரிக்கை விடுத்தார் என்பதும் குறிப்பிடத்தக்கது.