சிவாஜியோடு நடித்த முதல் சிங்கள நடிகை: இலங்கையின் அரசி காலமானார் !

இலங்கையின் அரசி … நடிகை திலகம் என்று அனைவராலும் அழைக்கப்படும் மாலினி பொன்சேகா நேற்று(24) காலமானார். அவர் பைலட் பிரேம் நாத் என்ற தமிழ் திரைப்படம் ஊடாக தென்னிந்தியாவில் மிகவும் பிரபல்யமானவர் என்பது பலருக்கு தெரியாது. 1978ம் ஆண்டு வெளியான இந்த திரைப்படும் இலங்கை இந்திய கூட்டு தயாரிப்பு ஆகும். இலங்கை மற்றும் இந்தியாவில் சக்கை போடு போட்டு பாக்ஸ் ஆபிசை நிரப்பிய படம் , “பைலட் பிரேம் நாத்”

இதில் பல நடிகர்கள் மற்றும் நடிகர்கள் இருந்தார்கள். ஸ்ரீ தேவி உட்பட, விஜய குமார், ஜெய சித்திரா, சிவாஜி மாலினி பொன்சேகா என்று பல நடிகைகள் மற்றும் நடிகர்கள் இந்தப் படத்தில் நடித்து இருந்தார்கள். அவர் நேற்று (24) மரணித்த பின்னர். அவரது இறுதி ஊர்வலத்தை எப்படி நடத்துவது என்பது தொடர்பாக இலங்கை அரசு ஆராந்து வருகிறது. முழு விபரங்கள் கீழே …

இறுதிச் சடங்கு ஏற்பாடுகள் குறித்த உயர்மட்டக் கூட்டம்:

இறுதிச் சடங்கு ஏற்பாடுகள் குறித்து இன்று பிற்பகல் (மே 24) ஜனாதிபதி செயலகத்தில் ஒரு முக்கிய கலந்துரையாடல் நடைபெற்றது. புத்தசாசனம், மத மற்றும் கலாசார அலுவல்கள் அமைச்சர் டாக்டர். எச். எம். சுனில் சேனவி மற்றும் ஜனாதிபதியின் செயலாளர் டாக்டர். நந்திக்க சனத் குமாரநாயக்க ஆகியோர் தலைமையில் இந்தக் கூட்டம் நடைபெற்றது. இந்தக் கூட்டத்தின் போதே இறுதிச் சடங்கிற்கான உத்தியோகபூர்வ ஏற்பாடுகள் உறுதிப்படுத்தப்பட்டதாக ஜனாதிபதி ஊடகப் பிரிவு (PMD) தெரிவித்துள்ளது.

பொதுமக்கள் அஞ்சலிக்கான ஏற்பாடுகள்:

திருமதி. மாலினி பொன்சேகாவின் பூதவுடல் நாளை (மே 25) தேசிய திரைப்படக் கூட்டுத்தாபனத்தின் தரங்கனி மண்டபத்தில் பொதுமக்கள் அஞ்சலிக்காக வைக்கப்படும். அதனைத் தொடர்ந்து, திங்கட்கிழமை (மே 26) சுதந்திர சதுக்கத்தில் பொதுமக்கள் அஞ்சலி செலுத்துவதற்காக வைக்கப்படும்.

இறுதிச் சடங்கு திங்கட்கிழமை மாலை (மே 26) சுதந்திர சதுக்கத்தில் முழு அரச மரியாதையுடன் நடைபெறும். நாட்டின் பல்வேறு பகுதிகளில் இருந்து மாலினி பொன்சேகாவின் பூதவுடலுக்கு இறுதி அஞ்சலி செலுத்த வரும் பொதுமக்களுக்குத் தேவையான வசதிகளை வழங்குவது குறித்து விரிவாகக் கலந்துரையாடப்பட்டதாக ஜனாதிபதி ஊடகப் பிரிவு தெரிவித்துள்ளது.

இந்தக் கூட்டத்தில் ஜனாதிபதியின் சிரேஷ்ட மேலதிக செயலாளர் ரொஷன் கமகே, பொது நிர்வாக அமைச்சின் செயலாளர் எஸ். அலோகா பண்டார, புத்தசாசனம், மத மற்றும் கலாசார அலுவல்கள் அமைச்சின் செயலாளர் பிரின்ஸ் சேனாதீர, அத்துடன் திருமதி. மாலினி பொன்சேகாவின் குடும்ப உறுப்பினர்கள், சக கலைஞர்கள் மற்றும் பல முக்கிய பிரமுகர்களும் கலந்து கொண்டனர்.

இலங்கை சினிமாவின் பொற்காலத்தை உருவாக்கிய மாலினி பொன்சேகா, தனது கலைப் பணிகளுக்காகப் பல விருதுகளையும் பாராட்டுகளையும் பெற்றவர் என்பது குறிப்பிடத்தக்கது. அவரது மறைவு இலங்கை கலை உலகிற்கு ஒரு பேரிழப்பாகக் கருதப்படுகிறது.